鄭世豪離開TVB後收入差唔多 曾被林淑敏爆離巢 直認冇再聯絡

鄭世豪於TVB處境劇《愛．回家之開心速遞》飾演「細龍生」一角深受歡迎，不過因鄭世豪於5月離巢TVB，因此劇情以「細龍生」調往阿拉斯加分公司交代。鄭世豪5月底於社交平台發文，表示感激喺TVB二十四年嘅生涯中合作過嘅一班伯樂；不過，早於鄭世豪未公開宣布之前，「大小姐」林淑敏就於接受媒體訪問時透露鄭世豪已約滿。事後，鄭世豪回覆傳媒表示自己想待適當時候先告訴家人及對外公開消息，用上「居然被某人好肯定地證實」形容，並指影響咗其家人。鄭世豪又於IG限時動態表示：「逢親有人問我知唔知邊個嘅電話，我都會先詢問當事人的許可及交代咩事，才會再將人家的資料讓他們自己交換的。」疑似斥責林淑敏。林淑敏後來承認事情處理不當，會約對方見面傾吓。不過，日前鄭世豪為HOY TV節目《見招拆招風水局》錄影，透露與林淑敏冇聯絡，是次亦係佢離開TVB後首次幕前工作。

鄭世豪離開TVB後經營音樂學校，教音樂和戲劇，將個人經驗理念分享，近日更加灌錄新歌《聞住你陣除》，直言與喺TVB嗰陣收入差唔多。鄭世豪曾於去年喺社交平台抱怨被屈遲到：「呢個世界係奇怪的，一直太好人太準時，習慣毫無怨言的我，就算今日天地更要等7小時，也會俾人老屈等我的。」佢坦言嗰刻係有唔開心，但與TVB係和平分手，當初亦掙扎咗好耐，直指冇TVB就冇人認識自己，並感激TVB嘅栽培，只係想有新嘗試先決定離開。對於疑不滿林淑敏搶先公布離巢消息，鄭世豪表示當下係有愕然，因為自己係想等最後一集劇集播出後先對外宣布離巢，更用電影作比喻，指睇完一套電影都唔會話俾人聽結局係點。對於與林淑敏現時關係，鄭世豪坦言離開TVB後已冇再聯絡，亦指一向少聯絡，就算與其他同劇演員都好少見面

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！