金馬獎2023 完整結果 ｜港產片揚威掃六獎 《年少日記》奪最佳新導演 《白日之下》無緣桂冠

【Yahoo娛樂圈實時文字直播】

【第60屆金馬獎頒獎禮】

昨日（25日）就係第60屆金馬獎頒獎禮嘅大日子，今年有4套香港電影成功入圍多個獎項，包括係《白日之下》、《年少日記》、《填詞撚》及《但願人長久》。喺眾多提名中，卓亦謙憑《年少日記》成功獲得「最佳新導演」，謝咏欣亦憑《但願人長久》奪得「最佳新演員」。曾參演多部港產片的「一代女神」林青霞獲頒第60屆金馬獎「終身成就獎」。

香港導演何思蔚就憑鮮浪潮短片《直到我看見彼岸》奪最佳劇情短片；「最佳動畫短片」就由香港導演陳嘉言、黃曉傑以《夏夢迴》奪得，再加上《年少日記》同《但願人長久》喺日前分別先獲頒「觀眾票選獎最佳影片」同「國際影評人費比西獎」，絕對可以話係為港人爭光揚威海外。

此外，盧凱彤遺孀余靜萍憑《（真）新的一天》成首位「金馬最佳攝影」女性得主，她得獎後擁抱頒獎嘉賓滿島光同許光漢，獲全場掌聲。

【余香凝鍾雪瑩雖敗猶榮 12歲林品彤成「最年輕金馬影后」 吳慷仁封影帝】

今年有2位香港女演員入圍「最佳女主角」，分別係《白日之下》余香凝及《填詞撚》鍾雪瑩。不過佢哋都不敵年僅12歲，憑《小曉》封后嘅林品彤，雖敗猶榮。至於「最佳男主角」就由吳慷仁憑《富都青年》奪得。電影《石門》則奪得第60屆金馬獎「最佳劇情片」。

【「一代女神」林青霞出道半世紀榮獲「終身成就獎」 示愛家人：他們成全了今天的林青霞】

現年69歲嘅「一代女神」林青霞獲頒第60屆金馬獎「終身成就獎」。出道半世紀嘅佢，出演過嘅電影多不勝數，最具代表性嘅角色一定要數《笑傲江湖2東方不敗》中飾演「東方不敗」，以及《滾滾紅塵》中飾演「沈韶華」，而佢亦憑「沈韶華」呢個角色喺三度提名金馬獎最佳女主角後成功獲獎。喺頒獎禮中亦都播出林青霞歷年嘅作品、得獎片段、訪問片段及心路歷程等等。

喺獲獎致謝時，林青霞提到：「我從千里之外歸來，在生我、養我的地方獲得電影界最高榮譽「終身成就獎」，對我來說意義非常的重大，我把它獻給我的母親父親，他們為了我辛苦拍戲，不知道操碎了多少心，在天上的他們必定感到莫大的欣慰。」

林青霞亦都特別多謝幾位演員及電影工作者，包括瓊瑤、徐克導演、施南生，及張叔平等等。佢最後亦都向丈夫及女兒示愛：「他們總是默默地支持我，從心所欲的做自己有興趣的事，成全了今天的林青霞。」

【盧凱彤遺孀余靜萍憑《（真）新的一天》成首位「金馬最佳攝影」女性得主】

余靜萍以《（真）新的一天》獲得「最佳攝影獎」，成首位女性得主，而佢亦係已故歌手盧凱彤遺孀。佢喺宣布獲獎後上台接過獎座，只係向觀眾鞠躬冇發表得獎感言，擁抱頒獎嘉賓滿島光同許光漢後做離開頒獎台，贏得全場掌聲。

【香港導演何思蔚憑鮮浪潮短片《直到我看見彼岸》奪最佳劇情短片】

香港導演何思蔚憑鮮浪潮短片《直到我看見彼岸》奪最佳劇情短片，佢除咗感謝評審、其他創作者、自己嘅團隊發家人，並表示：「我唔敢講呢個係個完美嘅作品，但呢個係我哋努力嘅見證。」佢同時勉勵大家：「在說話不可名狀的日子，我希望我自己，還有生活在香港的每一位，都可以更勇敢、更堅強的用自己的步伐往前進，真誠紀錄，好好生活。然後不要遺忘對自己重要的一切，直到我哋看見彼岸。」

【卓亦謙憑《年少日記》奪「最佳新導演」 謝咏欣奪「最佳新演員」】

頒獎禮開場後第一個頒發嘅獎項就係「最佳新導演」，結果由香港電影《年少日記》導演卓亦謙奪得，佢喺發表得獎感言時多謝台前幕後，包括監製爾冬陞，更特別感謝女朋友喺佢患抑鬱症時女友陪伴，大方示愛：「我謝謝你的愛，你美麗的靈魂陪著我走出黑暗，我愛你。」最後佢亦多謝電影中主角原型，佢喺天上嘅朋友：「感謝天上的朋友，我已無法擁抱他，希望留下來的人互相擁抱。」

另外， 香港演員謝咏欣憑《但願人長久》奪得「最佳新演員」，上台時嘅佢因為緊張差啲跌倒，而喺發表得獎感言時多謝戲中演員及工作人員，令佢可以第一次演出就十分順利，並搞笑感謝父母：「因為他叫我一定要提到他們。」佢最後亦都承諾會繼續努力演出更好嘅作品。

【紅地氈盛況】

今日下午5點，一眾演員藝人陸續現身紅地氈，多名香港演員亦有盛裝出席，當中包括擔任頒獎嘉賓嘅「文青女神」袁澧林、柯煒林，聯同《小曉》劇組現身嘅劉俊謙，以及有份獲提名嘅香港電影《但願人長久》、《填詞撚》、《年少日記》、《白日之下》劇組等等。除咗一眾香港演員，亦都有唔少香港人熟悉嘅藝人嘅電影工作者，例如日本著名導演北野武、桂綸鎂、林志玲，「終生成就獎」得主林青霞，以及憑《關於我和鬼變成家人的那件事》劇組雙雙入圍「最佳男主角」嘅許光漢、林柏宏等等。

【第60屆金馬獎頒獎禮 - 前哨 】

喺頒獎禮舉行前，評審團率先宣布多個獎項，當中《年少日記》奪得「觀眾票選獎最佳影片」，而導演卓永謙嘅父親原來就係政務司副司長卓永興，網民發現後更喺網絡引起熱烈討論，有網民甚至猜測鄭中基角色原型係唔係卓永興。而卓永興亦都有喺回覆傳媒時祝賀兒子：「作為父母，兒子有自己喜愛的工作，我十分高興。希望他繼續努力，活出自己的一片天。」另外，香港電影《但願人長久》奪得「國際影評人費比西獎」；而「終身成就獎」就由香港人非常熟悉嘅一代女神林青霞及陳坤厚奪得。

第60屆金馬獎頒獎禮於晚上7點正開始。Yahoo娛樂圈為大家帶來實時文字直播。

金馬獎2023港產片入圍及得獎名單：

• 《白日之下》

5項提名：最佳女主角、最佳男配角、最佳女配角、最佳美術設計、最佳造型設計

• 《年少日記》

5項提名：最佳劇情本、最佳男配角、最佳新導演（得獎）、最佳原著劇本、最佳剪輯

• 《填詞撚》

2項提名：最佳女主角、最佳改編劇本

• 《但願人長久》

2項提名：最佳改編劇本、最佳新演員（得獎）

• 短片《直到我看見彼岸》

入圍「最佳劇情短片」（得獎）

• 短片《夏夢迴》

入圍「最佳動畫短片」（得獎）

*《年少日記》金馬獎賽前獲頒「觀眾票選獎最佳影片」

*《但願人長久》金馬獎賽前奪得「國際影評人費比西獎」