錦心似玉︳新劇人氣再彈起 鍾漢良向外闖紅遍兩岸 身價2百萬一集

由《延禧攻略》導演溫德光執導嘅內地網劇《錦心似玉》成為熱煲劇集，男女主角鍾漢良同譚松韻雖然真實年齡相差16歲，但係劇中談情戲絲絲入扣，睇到心心眼～

近年主力喺內地搵食嘅鍾漢良，本身喺香港出道，但係反而跳出香港之後先紅遍兩岸。究竟係香港人唔識貨，定係佢都係啱出外搵食？

鍾漢良嘅星途同郭富城幾類似，1993年考入TVB做舞蹈藝員，同一年就已經被調去藝員部，參演以溫拿五虎故事為藍本嘅《少年五虎》飾演鍾鎮濤。後來拍過好幾套劇，最突出係《親恩情未了》演弱智人士，同劇仲有鄭秀文。

鍾漢良留喺TVB兩年有多，之後被香港出生台灣發展嘅歌手邰正宵賞識，去到台灣出唱片。當年港星喺台灣仲吃香，鍾漢良好快就走紅，半年間出2張專輯，被當地稱為「小太陽」。第2年喺台灣拍嘅電影《超級班長》成為暑假票房冠軍，年尾仲拎埋十大偶像，人氣迅速彈起。

後來鍾漢良同唱片公司約滿，開始轉拍台劇，並且喺千禧年間進軍內地拍劇，可以話係頭一批主力北上搵食嘅香港藝人。鍾漢良喺內地keep住受歡迎程度，基本上每年都有劇出街。根據報導，有傳鍾漢良3年前拍劇身價已經係190萬人民幣一集，加埋電影、綜藝節目及大量代言，身家近億唔出奇。鍾漢良2013同2016年都有拍杜琪峯執導嘅《毒戰》同《三人行》，算係回歸一下香港市場，不過冇咩後續。

鍾漢良算係圈中少數「緋聞絕緣體」，多年來傳過吓同內地女星唐嫣秘戀，不過佢地一齊拍過劇集《何以笙簫默》，外界估計係煲水炒作居多。反而早年有傳媒報導過，鍾漢良同設計師謝易樺秘婚多年，甚至已經有個今年大約10歲嘅囡囡，但係鍾漢良一向都對家庭狀況三緘其口，又否認過已婚，可能都係費時影響家人。前年有傳聞話鍾漢良患上焦慮症，甚至因此自殘，佢立即透過律師發聲明澄清。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！