陳法蓉為當年「掌摑事件」嫌疑人一事回應 被讚靚過港姐三甲

王晶曾於YouTube頻道節目《王晶笑看江湖》曾提及喺亞視拍劇期間，有兩名女主角發生一單爭風呷醋事件，涉及掌摑情節。即使王晶未有指名道姓，但唔少網民都估係李麗珍和陳法蓉，陳法蓉曾於2010年接受陳志雲主持嘅《志雲飯局》訪問，公開表示有次拍攝《美麗傳說》期間，導演喊放食飯之後，有位演員衝咗入嚟伸手打人，其助手走到佢面前受咗一巴掌，其後該演員想繼續踢佢。陳法蓉日前（15日）為《2024年香港小姐競選》擔任評判，及後接受訪問時再被翻起當年傳聞。

陳法蓉於1989年參選香港小姐競選勇奪冠軍，即使現時已年屆57歲之齡，但外貌與身材皆保養得宜，好似食咗防腐劑一樣。日前，陳法蓉身穿黑色低胸魚尾晚裝出席《2024年香港小姐競選》決賽，與曹敏莉、朱凱婷、翁嘉穗及劉倩婷為「最上鏡小姐」擔任評判，最後選出11號梁嘉莹（Emily）成為「最上鏡小姐」。事後，陳法蓉接受訪問時表示自己都有留意王晶嘅YouTube節目，對於被指係「掌摑事件」嫌疑人，陳法蓉回應指對方無開名，無需要再去補充及回應。

陳法蓉亦於社交平台分享與新一屆港姐三甲嘅合照，但唔少網民就將焦點放於陳法蓉身上，留言激讚陳法蓉靚過新出爐嘅港姐：「還是你最美」、「你仲靚過佢地好多啦」、「女神」、「你氣質好過她們，真係好靚喎！支持！」、「你仲靚過果三位得獎人！你個樣根本就冇變過！」、「漂亮迷人，儀態萬千，你最美」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！