【離散香港記者系列】以「新移民 beat」連結港人 海外報道為消失聲音補位

港人移民報道需求增

我們擁有的身份證就算已在袋中，但不小心保管也會隨時扔失，又或被扒手竊走，當新聞自由如同身份證，假如沒有被捍衛自然難保平安。扔失了身份證，報失前大家會先落力尋找，香港記者面對新聞自由失去，有人就決定離港尋找自由空間，望在海外延續理想。

自由記者 Kris Cheng 現以英國為基地，他去年 6 月尾因《蘋果日報》事件而離港，「覺得傳媒人喺香港有實際危險，當時幾個行家都決定走，繼續留喺香港做記者，預視有好多困難；香港做唔到，喺外國繼續做。」他幸運獲工作安排，能續留傳媒業，「如果冇呢啲機會，搵工應該會幾難，仲要適應生活。」

Kris 現時報道工作重點，盡可能關注香港事件，集中報道港、台、中國新聞，同時也報道跟移民港人生活有關的消息，例如烏俄戰爭。這場戰事港人過去關注，但感覺不「埋身」，在歐洲卻因引來能源問題，對離散在英的港人生活帶來影響。其實Kris曾一度以為港人移民的相關故事，「需求」會慢慢消失，「最多寫兩年」，但現時愈來愈多議題可報道，「變成好似做咗一條新移民beat咁；報當地故事，其實都可以用嚟連結香港人。」

此外，他也盡力書寫以身在香港的港人為目標讀者之報道，包括制裁、海外法官辭職，或涉及香港懲教處等新聞，共通點是這些新聞題材在港媒中報道篇幅大減，「有啲新聞，香港行家冇報嘅？以前自己喺香港做記者，呢則消息大家應該會跟進，點解家陣冇咗？唔知大家係咪有難處，可能大家都受緊壓力吧！」

無法掌握紅線只靠專業判斷

那如何衡量風險？他稱自己未能做到香港外國記者會主席 Keith Richburg 聲稱：「成功的記者要知道紅線在哪裡」，「我自己就冇能力掌握條紅線喺邊啦，做咗8、9年記者，只能夠按專業判斷，好正常嘅新聞點解唔做？但有啲新聞可以想像人在香港，可能好難搵到受訪者，大家會考慮安全問題。」

「離地」報道香港事終有局限，Kris 說困難之一是時差，如要跟貼事件會生活日夜顛倒，猶幸也不是他現時主要工作，反而不少學者及評論員已身處海外，找他們回應事件倒變得容易。

更現實是在自由國度書寫不自由的香港，報道對象或是自己認識的人，心情豈會好受？ Kris頓一頓說：「我唔想講對唔住」，但承認確損失在現場感受及跟大家面對面聯繫的機會，卻也是成為他堅持下去的理由，「我比其他人幸運，搵到相關工作繼續留喺行業內，如果仲有啲嘢可以貢獻到，都會繼續；拎獎嘅行家冇得再做記者，真係好嘥，大家對呢份工唔係當搵食，呢啲聲音會喺公眾消失。記者係寫下歷史初稿，現時連寫嘅機會都冇。」

風險下更要「對得住自己」

Kris 日前出席英國外國記者會活動，跟去年獲諾貝爾和平獎得主、俄羅斯獨立報章《新報》之駐英記者同場，「香港新聞自由情況比俄羅斯仲好，大抵只係因為暫時未有記者被殺害，聽對方講俄羅斯情況，地名換成香港完全冇違和。」

他說「香港記者」這身份「唔會搣得甩」，而出走海外，也有點像條單程不歸路，因愈努力書寫，愈可能在紅線下失去「返回香港的自由」，是否會掙扎和後悔？「民運人士當年都有面對離開國家，不能回國，就算要探親都唔得，但對得住自己好緊要；其實你只要有任何形式政治接觸，都會有危險，咁要冇風險，一係唔講，否則任何時候都有政治風險。」

近期一些海外新媒體成立，同以繼續報道香港事為主打，嘗試「遙距」為港人補足資訊，Kris也不知是否未來出路，但認為這些新媒體資源緊絀，參與報道記者亦多匿名，猜測大家都有安全考慮，相信是現時僅可盡做的辦法之一。