雷劈潛水學校燒清光 余曉彤慘蝕過百萬

·2 分鐘文章
Hidy視火災為「超級斷捨離」,趁機找尋事業新方向。
Hidy視火災為「超級斷捨離」,趁機找尋事業新方向。

熱愛潛水的藝人余曉彤,2年前開設潛水學校圓夢,然而學校早前遭雷電劈中,發生火災,致價值過百萬的潛水裝備在15分鐘內化為灰燼,血本無歸!災場儼如廢墟,她為此喊足3日,滿目瘡痍的畫面及燒焦氣味至今仍揮之不去。

以「新八模」之名入行、曾掀起宅男搶購寫真熱的余曉彤(Hidy)向來是運動健將,身兼越野跑手及潛水教練,擁有15年潛水經驗,2019年,她與前夫、前甲一籃球員劉健明在赤柱開設潛水學校,可惜好景不常,2人同年離婚,去年學校又因疫情而停課,生意大受打擊。

冇金主全靠自己

禍不單行,早前學校因被雷電劈中而發生火災,所有心血付諸一炬,幸冇人受傷,她說:「行雷打中電箱,成間學校喺15分鐘內燒晒,當時真係好震撼,原來火燭係咁近嘅事,我花咗幾日去清理現場,真係好恐怖,啲嘢燒晒,嗰陣味揮之不去,個畫面仲喺我腦海,好彩冇人命傷亡,但財物就Total Loss。(有冇買保險?)冇。(損失幾多?)過百萬,所有學生嘅潛水裝備都燒晒。(好大打擊?)大打擊!我喊咗3日,好唔捨得!我潛咗水15年,逐少逐少咁儲裝備,儲到可以開學校其實唔容易,我又唔係有金主投資,要靠自己努力,但失去只係一剎那!」當年落手落腳裝修及修葺學校的回憶,至今仍歷歷在目。

「超級斷捨離」逼進步

學校化為烏有,但Hidy非常樂觀,視之為超級斷捨離:「唔係壞事,令你重新去諗點行,有個新方向,咁先令你進步。」她坦言火災前因疫情及禁聚令關係,她已開始轉為網上授課,問到學校會否重開?她指現時由業主負責重建,但她不想坐以待斃,會朝下個目標進發:「好在有好多前輩幫手,身邊好多人知道後,拍膊頭話會全力支持我,有前輩借地方同裝備,又陸陸續續有品牌畀好多嘢我,好開心。我有個網上平台,會繼續同唔同機構合作宣揚環保,又研發咗個保護珊瑚嘅防曬產品。」

新一年,Hidy有不少新挑戰,為海洋出力的她,應品牌邀請圍繞港島跑55公里,以幫助回收550個水樽,循環再造成波鞋。她最近又接拍了一個關於海上遊的電視節目,有機會駕駛遊艇:「我考咗6次終於考到船牌,可以學以致用。」

心血結晶慘成廢墟,Hidy欲哭無淚。
心血結晶慘成廢墟,Hidy欲哭無淚。
哭乾眼淚,Hidy與友人重返災場善後。
哭乾眼淚,Hidy與友人重返災場善後。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能