電影LOL︳1億美金倒落海!華納全面抽起《蝙蝠女》連串流平台都唔放

電影LOL︳1億美金倒落海!華納全面抽起《蝙蝠女》連串流平台都唔放
電影LOL︳1億美金倒落海!華納全面抽起《蝙蝠女》連串流平台都唔放

呢單今日最震撼!外媒確定片商華納抽起將近埋尾嘅新片《蝙蝠女》(Batgirl),唔上戲院之餘,狠心到連自家串流平台HBO Max都冇得睇!

今年4月同Discovery 合併嘅華納,新CEO David Zaslav上任後大刀闊斧,話咁快就將旗下出世一個月左加嘅付費內容平台CNN+摺埋,仲話係果斷決定。綜合各方報導,而家華納有一套內部機制,決定電影作品會係戲院放映、串流平台上架定直接抽起。而早前搞試映嘅《蝙蝠女》,據聞觀眾反應差到不得了,計過條數再搞宣傳都係無補於事,有關方面擔心《蝙蝠女》出到嚟都係仆直,甚至會牽連致力打造嘅DC宇宙。結果喺新官上任嘅情況之下,一嘢被消失。

其實《蝙蝠女》卡士唔差,先有90年代嘅蝙蝠俠米高基頓(Michael Keaton)再演呢個經典角色,又有一度好靚仔兼身材正爆、後來被指暴肥嘅Brendan Fraser,要演技亦有憑《鼓動真我》(Whiplash)演嚴厲鼓手老師拎金像獎最佳男配角嘅J.K Simmons。演蝙蝠女嘅拉美女歌手Leslie Grace都夠晒新鮮感。導演Adil El Arbi 同Bilall Fallah拍嘅《重案夢幻再重組》口碑亦唔錯,本來排年尾至明年初面世嘅《蝙蝠女》,突然胎死腹中,都幾出人意表。

有心水清網民就話,早排美國動漫節Comic Con上,只係見到《蝙蝠女》少量宣傳,大家仲以為華納策略上想主打新一套《沙贊!》同埋Black Adam,原來暗地已經有變數。

各個片商呢幾年都係將自家作品嘅人物同故事線,築起一個自成一派嘅宇宙。今次咁樣抽起《蝙蝠女》,最大件事係DC宇宙其餘幾套作品Black Adam、《沙贊!2》等,因為劇情一定同《蝙蝠女》有關聯,好可能都會受影響。

更多電影文章

電影LOL.今期睇咩戲︳七人樂隊/心裏美/鬼咒/智理想情人/決戰江陵

電影LOL︳《反斗車王》網劇9月上架 哨牙麥同麥昆去旅行 原因竟然係咁?

電影LOL︳《洛奇》旁枝人物變主角 史泰龍冇得分 出post鬧爆監製係吸血鬼

電影LOL︳唔嫁又嫁 Ben Affleck為《水行俠》再演蝙蝠俠

電影LOL︳威尼斯影展競賽片單公布 狼人、邦女郎爭影帝影后 華語片0入圍

電影LOL︳MARVEL第5、6階段作品面世日期曝光 《復仇者聯盟》2025年一次過出2集

電影LOL︳《黑豹2》預告片登場 邊個取代已故Chadwick Boseman?

按此下載 全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能