電影LOL︳《Barbie芭比》北美開畫高收1.55億美元創年度紀錄 《奧本海默》破8千萬帶挈戲院好生意

今個暑假檔期最期待嘅大片對決，《Barbie芭比》大戰基斯杜化路蘭（Christopher Nolan）執導嘅《奧本海默》（Oppenheimer）正式上演，首個周末嘅票房數字亦隨即公布，結果可謂三贏。

《Barbie芭比》開畫週末嘅北美票房收1億5500萬美元（下同），成為今年新片開畫票房冠軍。本來Barbie預計開畫收半億，但宣傳聲勢之下備受睇好，外界估可以收9300萬，結果再超出預期。《Barbie芭比》同時創下多個紀錄，包括今年單日開畫最高紀錄、女導演最佳開畫票房作品、導演GretaGerwig及女主角Margot Robbie的個人作品開畫紀錄等。而《Barbie芭比》海外都收到1億8200萬，加埋超過3億3千萬，應該入硬年度十大。

至於《奧本海默》北美開畫票房為8,050萬美元，同樣比預期高好多。《奧》因為片長近3小時，開嘅場數比《芭比》少，加上片種等因素，一早預咗冇老幼咸宜嘅《芭比》咁好數。

之所以話係三贏，因為北美唔少影迷都響應湯告魯斯嘅呼籲，一次過睇晒2套大片，外媒稱呢個現象做為Barbenheimer。連大導演昆頓塔倫天奴都被人見到，喺戲院睇完《奧本海默》就買飛睇《Barbie芭比》。因為Barbenheimer現象，上周末北美全部戲院總票房收入衝破3億，係史上第4次，而對上一次戲院有咁熱鬧已經係2年前聖誕檔前夕、《蜘蛛俠︰不勝無歸》上映嗰陣，當時全國戲院周末收入有2億8180萬。兩套大片打對台，結果皆大歡喜，影迷可能以後會有更多呢種一日走兩場嘅情況，開心！

更多電影文章

電影LOL 今期睇咩戲︳奧本海默／Barbie 芭比／老公死亡筆記／惠子的凝視

電影LOL︳暑假壓軸新片The Retirement Plan 又係尼古拉斯基治！又係老豆救女！

電影LOL︳荷里活演員罷工 湯告魯斯幫手斡旋 各大電影節準備變陣

電影LOL︳演員工會罷工 藝人爭相踢爆片商慳錢賤招︰用AI取代茄喱啡

電影LOL︳涉及核爆敏感話題 網傳《奧本海默》被拒日本上映 電影公司未有明確表示

電影LOL︳巨星也罷工！荷里活演員工會加入工潮 專家估計損失達40億美元

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！