4間韓系咖啡店合集 大埔水泥風三層cafe、西柚吐司

韓風話咁快都風靡咗全球十幾年，連帶韓式食物都好受歡迎呀。今期介紹幾間啱晒打卡嘅韓系cafe畀大家，全部嘢食都有創意又好食～

芝士火腿Croffle三文治 GOODIN’ OUT

簡約風嘅韓式Cafe，店主為韓國人，由裝修到餐具都令你置身於首爾一樣！必食有呢個Ham & cheese croffle sandwich，就算相機食先牛角包重係外脆內軟，包入面有半溶芝士、炒蛋、番茄、火腿同沙律醬，甜甜鹹鹹好好味，重好足料。Grapefruit Toast都好特別，平時好少見呢個配搭，西柚、鄉村芝士同法式甜包，清新開胃。

韓國過江龍 sips;;lban

來自韓國仁川嘅過江龍人氣咖啡店，以刨冰同蛋糕聞名，口味都好有特色～好似呢個軟綿綿粟米蛋糕，海綿蛋糕配上燒粟米，蛋糕體充滿粟米味，帶少少甜，中間係一層香濃嘅粟米忌廉，連埋上層嘅真粟米，啱曬粟米愛好者！香濃花生夢幻冰沙都係必試，軟滑嘅綿綿冰包裏住煙煙韌韌嘅蕨餅，上面佈滿紅豆同香滑濃郁嘅花生醬。鹹食方面推介玫瑰醬八爪魚年糕，年糕屬於幼長身嗰款，好有咬口；玫瑰醬微辣香甜，八爪魚軟腍度適中。

韓式水泥風三層cafe Tamora

想假日去遠啲chill吓嘅，大埔呢間人氣嘅韓式水泥風三層cafe就啱晒！水泥風設計，三層連埋天台，空間感十足。Menu貴精不貴多，只有Croffle、芝士蛋糕、咖啡同濟洲特飲，JEJU Matcha Latte選用韓國濟州抺茶，香濃帶淡淡回甘。即叫即整嘅Croffle好酥脆，芝士蛋糕仍然保持有少少流心，出色！

招牌柑橘窩夫 Terrace in seaside

一間連鎖嘅韓式咖啡店，主打一系列創意韓國料理同柑橘主題甜品，招牌韓國螄蚶拌飯，螄蚶嘅味道就好似蜆一樣，但係會濃縮少少，拌埋泡菜飯食真係一流，加埋蝦仁重爽脆啲𠻹。炸大魷魚伴炸醬麵啱晒打卡！麵質好彈牙，炸醬甜甜鹹鹹，同拌麵好夾；炸大魷魚嘅粉漿係薄薄一層，香脆唔油膩。最後甜品一定要食呢個柑橘窩夫伴雪糕，窩夫本身牛油味比較香濃，配埋juicy又冇渣嘅柑橘，清新又鮮甜。

文：Yanica
編：Cathy