首夫妻檔掘金認「超值」 張繼聰坐謝安琪車以和為貴

藝人張繼聰與太太謝安琪首度夫妻檔出席活動吸金，愛車如命的阿聰面對「老婆定車係大婆？」的尖銳問題時，諗都唔諗便答「佢係主人」，令謝安琪冧到暈！

謝安琪（Kay）昨日在活動上，搞笑「質問」老公張繼聰她與車所佔的人生比重時，阿聰淡定回答：「小部分啫！我大部分都係奉獻晒畀家庭。」問到是否報酬吸引才夫婦檔亮相，他說：「其實一直有人邀請，睇緣分囉！今次咁啱講環保車，同我哋嘅生活都幾近，所以出席。（重金禮聘？）我只可以講物超所值。（會買電動電單車？）我太多車喇！同埋老婆依家喺隔籬，唔好問我呢啲問題，哈哈。」

Kay自言都是愛車之人：「我鍾意揸車嘅程度係接完朋友食飯，再送佢返屋企。」問到兩公婆有否為駕駛問題嗌交，阿聰即搶答：「我哋好和平嘅，多數都係我揸，佢同小朋友玩。（太太同車邊個係大婆？）諗都唔使諗呀！佢係主人！」聽到Kay甜絲絲！

盡量唔出聲

兩公婆又冧爆互讚，阿聰讚老婆手車唔錯，感激她經常接收工，笑言會壓制自己唔出聲；Kay則揚言因老公揸車叻而對他加分：「安全、快速到達，又會照顧乘客，唔係個個都做到。」

最近Kay正籌備與方皓玟的8月演唱會，她說：「好耐冇試過同其他人合作。」阿聰則會於10月開騷：「本身係4月開，不過未宣傳已經疫情，嚟緊要拍埋套電影先。」