馮素波80大壽秒速阻止TVB藝員契仔接隔籬台咪牌 原來佢試過因為咁收警告信

資深藝人馮素波（波姐）出身於演藝世家，當年以童星身份出道，縱橫演藝圈超過70年，演技毋庸置疑。前晚（7日）波姐舉行80大壽壽宴，一班契仔契女廣邀圈中好友出席，當中包括七公主嘅薛家燕、陳寶珠及沈芝華，場面非常熱鬧。期間波姐與契仔嘉駿接受傳媒訪問，嘉駿未有為意就拎住隔籬台咪牌，非常醒目嘅波姐即時拎走HOY TV咪牌，並表示佢試過因為咁而收警告信。

馮素波與契仔嘉駿喺壽宴中接受訪問，嘉駿未有為意就拎住HOY TV咪牌，波姐好快速就喺佢手中拎走，並話「我揸啦呢個咪！公司出Warning Letter㗎，我收過喇，所以我擔心你。唔使驚，阿媽喺大廳，波姐喺大廳！」

事後馮素波接受傳媒查詢時就講述收警告信嘅事件，佢就話2000年出席父親馮峰喪禮，當時殯儀館出面有好多記者，亦有好多支咪牌，佢都分唔清楚係邊一支就接受圍訪，而當時係有亞視嘅咪牌。當被問到係唔係拎住亞視咪牌而收警告信，波姐就話唔係拎住支咪牌，只係佢哋隊咗個咪埋去佢度，淨係影住佢講嘢同埋亞視咪牌，之後亞視將訪問片段裁剪，並話佢接受訪問。波姐重申冇拎住亞視個咪，只係鏡頭前出到嗰支咪。

之後，波姐表示以往冇人訪問佢，佢細妹及余子明唔會答，就叫波姐做代表去講嘢。當時太多咪喺佢前面，而亞視個咪因為放太前，所以就影咗出嚟。跟住TVB就問佢做乜嘢接受訪問，波姐當時否認，但TVB就話出咗鏡嗰一下，並同佢講「其情可憫」。

波姐表示事後有人打電話俾佢，叫佢去藝員部，通知佢將會收到警告信，當時佢就問收到信後應該要點做，對方就答佢三個月唔好再犯。波姐表示佢之後就好留意訪問係乜嘢咪牌，咩咪佢都唔會接，除非係佢唱歌嗰一支。最後，佢仲搞笑話嗰時係死人，唔通三個月又死咩，所以佢覺得係笑話。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！