高海寧都打氣支持 國際小姐香港代表梁庭欣被讚「靚過今屆港姐三甲」
以往TVB舉辦嘅香港小姐,選出嘅三甲都會代表香港出戰國際性選美。但TVB近年已經冇再派佳麗出戰,各大選美活動於是委託本地代表,挑選靚女為港出戰。
今屆國際小姐將於10月喺日本東京舉行,而「國際小姐香港代表競選」已於7月完成,25歲嘅模特兒Verna梁庭欣脫穎而出,成為「香港小姐」代表香港參賽。Verna身高5呎9吋,而且登上過國際時裝周嘅品牌天橋,高䠷身型同經驗,喺國際小姐絕對有競爭力。
本來無比較無傷害,但係到早前港姐三甲決出之後,有網民將梁庭欣同今屆港姐冠軍莊子璇作對比,就話Verna顏值完勝。如果比對埋亞軍王怡然嘅「父母走數傳聞」,同埋季軍王敏慈被指有「執靚」嘅美貌,梁庭欣就更加無得輸。Verna喺個人IG宣布成為新一屆國際小姐香港代表之後,港姐出身嘅高海寧都留言叫佢加油。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!