黃心穎暗示「安心事件」後曾向鄭秀文道歉 不強求被原諒

轉型成為歌手嘅黃心穎，近期為推出新歌接受訪問，除咗講音樂之外，更罕有談到4年前令佢事業一鋪清袋嘅「安心事件」。

4年前有傳媒公開疑似的士司機提供片段，見到已婚嘅許志安同上位中嘅黃心穎喺車上激吻，事件轟動一時，事後許志安開記者會公開道歉。而另一主角黃心穎就一直收埋自己，到呢一兩年先至以歌手身份現身。而心穎就喺10月同RubberBand鼓手泥鯭（黎萬宏）結婚。

回看當年成為新聞人物，心穎直認做錯咗，做咗個不顧後果同不負責任嘅選擇；至於有冇後悔，佢就話冇辦法後悔，亦其實不後悔，但承認當日呢件事有傷害其他人，亦牽涉到別人，當初冇諗清楚就去做。

被問到有冇向安仔太太鄭秀文道歉，心穎認為唔需要同其他人交代有冇做，又反問「貼出來就係有做？」。咁Sammi有冇原諒佢？心穎話不能強求，亦要學習原諒自己先可以向前行，而自己「出事」後一度覺得自己唔應該開心，而家已經康復七八成。而家心穎有研究佛學，佢視「安心事件」係好差嘅經歷，但而家會感激呢件事令佢成長，唔會再傷害別人。「安心事件」發生後，黃心穎本來有份嘅劇集《法證先鋒IV》戲份全刪，由曾經友好嘅湯洛雯頂上，「靚湯」甚至「接收」埋本來同心穎交往中嘅馬國明。早前馬國明同湯洛雯結婚，心穎訪問中都有祝福佢地。

早前心穎爸爸黃沛霖逝世，心穎對此都有另一種睇法，感恩爸爸見證到佢結婚，但否認因為爸爸近年身體麻麻而提早婚期。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！