黃祥興重提細佬黃長發姊弟戀 因心痛感觸落淚：對佢打擊好大

黃祥興2005年由法國返香港參加香港先生，入行多年都成日飾演出軌及偷食等角色，但現實中嘅黃祥興係人所皆知嘅愛妻號。而黃祥興嘅細佬黃長發亦都係參加香港先生入行，係2006年香港先生冠軍，但黃長發2009年同有鞋王之稱嘅鄧劍群三太李姿霆（Karen）發生姊弟戀，二人相差十六年，不被外界睇好，最終黃長發為愛宣佈退出娛樂圈，轟動整個娛樂圈。

早前黃祥興與高鈞賢及袁偉豪上清談節目《Tiger's Talk》，再次講到佢細佬黃長發同Karen一段情，黃祥興感觸落淚。因為戥細佬心痛，當初係佢叫細佬返香港參加香港先生，但後來成件事對佢打擊好大，到而家都驚其他人嘅眼神。黃祥興坦言自己對細佬同Karen嘅事了解唔多，淨係知Karen比細佬大好多同埋已經有小朋友，唔知佢哋點解會相戀，佢覺得對方係利用細佬。

事件對黃祥興都有一定影響，因為有人認錯佢係黃長發，搞到冇咗份代言合約，而公司劇集亦有影響，但佢無嬲細佬，只感到心痛而一度感觸落淚。

現年35歲嘅黃長發，喺退出娛樂圈後曾經轉行做會計師，不過近年就成立咗模特兒公司。至於感情方面，黃長發2015年與拍拖4年嘅捷克籍模特兒女友喺布拉格結婚。