黑雨 ⎮ 政府記者會李家超未列席 陳國基：特首已出新聞稿、徹夜給指示

歷時逾十六個半鐘的黑雨終於停歇，暴雨在全港各區造成災害，政府預警及應變能力受到質疑。政務局司長陳國基下午 （8 日）率領多名問責官員及部門首長召開聯合記者會，行政長官李家超沒有出席。為甚麼政府不直接宣佈全港停工？為甚麼深圳排洪前十六分鐘才出新聞稿？為甚麼李家超不列席記招？本文謹將記者會問題內容撮錄如下：

記者：政府今朝五點半已經發出極端天氣情況警告，點解勞工處指引要七點先出到？點解只係建議僱主唔應該扣減假期，跟返颱風指引，而唔係直接宣佈停工呢？

勞工及福利局局長孫玉菡：勞工處新聞稿主要係詳述一下喺極端情況下面，一啲僱員僱主應該注意嘅事項，包括僱主唔應該要求啲非必要人員返工，唔應該扣減工資或者假期。大家都理解，咁多年來，有颱風、暴雨，甚至今次嘅極端情況，大家一向都用我哋嘅指引，呢個都係行之有效嘅。大家都要明白，喺天氣差嘅情況下，有啲必要人員都要返工，大家都可以想像下，譬如喺醫院喇、安老院舍嘅員工，需要照顧啲人，都有需要返去嘅。所以我哋一向嘅做法，都係認為唔應該一刀切。

「同事成晚發出好多新聞稿」

記者：為甚麼行政長官不見記者？

政務司司長陳國基：行政長官早在上午一時半咗右已發出新聞稿及聲明，提醒公眾在暴雨下需要十分小心。他已徹夜向我們發出指示，如何應對各種問題。

記者：CE 出 facebook 之後，冇任何官員出來向市民交代或者指示大家點做，中間官員有咩工作呢？

陳國基：你睇到我哋成晚同事都係發出咗好多次嘅新聞稿，目的都係盡快應對問題⋯⋯每一次呢啲雨，嗰個可預計性係好低、好難，佢同颱風係唔一樣，我哋當然好想準確咁掌握到，但係呢個雨真係好難㗎，甚至乎落喺邊度、有幾廣泛、有幾大嘅雨量，其實都好難做出一個好準確嘅預測，所以先至唔能夠更早咁通知市民，但係成晚我哋發出咗成四次新聞稿，一路都有提醒市民有關嘅情況㗎喇。

「我哋做嘢唔係淨係出新聞稿」

記者：關於緊急警示（ 2020 年政府耗資 1.5 億元設立的流動電話緊急警示系統），其實同黑雨機制冇衝突，點解唔可以用多個方法確保所有市民能夠 100 %咁收到資訊，知道出面有危險，係咪政府低估咗嚴重性，先至冇用到呢個機制？

陳國基：今次咁急咁大嘅暴雨係從未有過嘅，而且佢好急，天文台已經喺不同時段發出咗不同暴雨嘅警示，一路加上去咁樣，市民應該好清楚知道情況係去到點樣。

記者：政府喺排洪十六分鐘之前先通知市民，咁短時間先通知會唔會太急？

保安局局長鄧炳強：我哋四十五分鐘之前就知道，十六分鐘之前出新聞稿，但係我哋做嘢唔係淨係出新聞稿，係透過新聞稿先通知市民。我哋第一時間知道排洪，第一時間已經安排好多部門，包括渠務署、消防處、民政署、社會福利署，第一時間去到實質真係受排洪影響嘅村裏面安排佢哋撤離或者其他工作，呢個我哋係冇一刻疏懶嘅，即刻做呢個工作。只不過與前同時，我哋再補充一個新聞稿畀所有香港市民知道嘅啫，所以我哋係最主要處理咗呢件事，為受影響嘅市民做咗工作先。

記者：呢次黑雨好多嚴重水浸，好多車死火，喺交通方面點解冇作一個預警？係咪警覺性唔夠？

陳國基：極端情況呢個字好闊，包括所有情況，如果發生咗一啲意外或者情況而令到香港大面積，譬如交通出現問題，甚至電力出現問題而需要市民特別注意，返工返學都有問題，我哋會公佈呢樣嘢。