點解阿媽咁鍾意問我「你瞓咗未？」……

細細個覺得媽咪係超人，咩都識。愈嚟愈大，大家返工返學，見面時間好少，無細個嗰陣咁Close，就愈覺得呢個女人真係令人又愛又恨。

每次想形容比其他人聽媽咪係個咩人，我都會用以下呢堆例子：

我阿媽好鍾意喺我差唔多瞓著嘅時候，敲房門大嗌：「阿女！阿女！你瞓咗覺喇？」通常呢個時候我死都唔會應門唔會應門唔會應門……但係！佢會自己開門嘅……「瞓咗又點應你呢？就算我未瞓，你咁樣敲門我都醒啦……」「哈哈哈哈哈又係喎。咁你得唔得閒呀？幫我Candy Crush過版吖！」都瞓晒上床喇，你覺得我得唔得閒吖嗱哈哈哈哈哈……

我每朝八點要出門口返工，而我係一定賴到七點九先會起身，一分鐘都無多，生死時速咁款。喺咁匆忙嘅十五分鐘入面，我阿媽成日都會同我講埋晒啲唔等洗嘅嘢：「阿女，我最近買咗隻新面膜，你可以試吓喎。」莫講話朝早起身未回到魂唔識應佢，就算我識，朝早梳洗完我都唔會敷Mask啩……

我阿媽對所有科技嘢都係一頭霧水。佢好鍾意問我：「咩咩咩個網址係乜？」「自己Search啦，你問我我都係去Google架咋。」「咁Google嘅網址係乜？」……又或者：「點解個畫面變成咁嘅？點禁返出去？」明明iPhone得一粒掣姐，最多咪螢幕上面有個Next、有個Back？！但每一次我都係會投降幫佢搞掂，因為就算點解釋，科技對好多阿爸阿媽嚟講仲係太高深莫測。

其實我知，有時佢哋只係想盡辦法搵啲話題同我講姐，每日放工返到屋企都一支箭標入房，根本無咩機會同佢哋傾偈。對上一代嘅人嚟講，返工搵食已經用咗每日大部份嘅時間，彷彿大半嘅人生都係為咗搵餐晏仔養起對仔女。莫講話會唔會同社會脫節，連同仔女溝通吓嘅時間都未必有。

每個周末返到屋企，一個禮拜嘅臭衫總係已經洗好熨好摺好整齊放喺房。上次寒流殺到，每朝媽咪都會早啲起身，焗一杯薑茶比我暖身先出門口返工。平時如果夜返，總會為我留一盞燈，其實我大個之後已經唔怕黑，但佢仲係當我細路女咁照顧。

就算幾老餅幾追唔上潮流都好，父母都只係用緊自己嘅方式去嘗試融入我哋嘅世界。問多兩句怕你煩，唔問唔睇住又會擔心。細個當我哋係問題兒童嗰陣，見到咩都打爛沙盤問到篤，走嚟走去無時停，阿爸阿媽都不厭其煩。今日我哋又有咩資格嫌棄佢哋？

「聽晚有無嘢做呀？帶你去睇戲喇？」阿媽即刻心花怒放，笑到見牙唔見眼：「真架？好呀，我想睇發哥嗰套呀！」「唔得呀蝗精拍架唔睇得！」「點解呀佢拍啲戲幾好笑架喎呢套仲有華仔同周星馳添喎……」阿媽，其實呢周星馳拍嗰套係叫……

************************************

（原文刊於yahoo style hk）

facebook專頁： b612lpp

instagram：b612lpp

tumblr：b612lpp

「倘若有一個人對一朵花情有獨鍾，而那朵花在浩瀚的星河中，僅此一朵。那麼，他只要仰望繁星點點，就心滿意足了。於是他喃喃自語：『我的花就在星河的某個角落』可是，這花一旦被羊吃掉了，瞬間，所有星星也將隨之黯淡無光。那你也認為這不重要嗎？」