雅虎香港新聞 【回顧2020．娛樂】2020劇集推介！ 《后翼棄兵》外今年必睇神劇懶人包
《后翼棄兵》（The Queen's Gambit）、《半澤直樹2》、《想見你》及《夫妻的世界》，唔知大家睇晒呢啲人氣劇集未呢？仲有唔夠一個月就2021年啦！因為新冠肺炎疫情嘅關係，大家都多咗留喺屋企煲劇。而家就同大家重溫2020年必睇海外神劇，以下嘅台劇、日劇、韓劇及歐美等劇集，總有一套啱你心水！
《后翼棄兵》
Netflix原創迷你劇集《后翼棄兵》（The Queen's Gambit）開播以嚟話題不斷，登上63個國家Netflix排行榜第一位，瘋魔全球，認真犀利呀！劇集除咗劇情緊湊又零冷場之外，女主角嘅精湛演出亦獲得好評，令到觀眾忍唔住睇完一集又一集。劇情主要講述Beth Harmon（Anya Taylor-Joy飾）係一名孤兒，住孤兒院期間佢對國際象棋產生興趣。之後，天才棋手Beth成功喺男性主導嘅棋界突圍而出，更打敗蘇俄國際象棋冠軍，成功為女性爭光。
《夫妻的世界》
由金喜愛、朴海俊及韓素希主演嘅韓劇《夫妻的世界》，一開播即喺各地掀起煲劇熱潮。除咗因全劇16集有14集係「19禁」之外，賤男拋棄正印及老婆復仇嘅緊湊劇情，睇到觀眾咬牙切齒，絕對係今年嘅人氣話題之作。
《雖然是精神病但沒關係》
由強勢回歸嘅金秀賢及徐睿知主演嘅韓劇《雖然是精神病但沒關係》，劇情講述文康泰（金秀賢飾）於家內外都需要照顧有自閉症嘅哥哥及精神病病人，忙碌與壓力令佢拒絕愛情，只希望同哥哥好好生活。後來，性格冷漠又目中無人嘅女童話作家高文英（徐睿知飾）出現，竟令到二人有互相學習機會，談一場令大家心靈有安慰，彼此治癒嘅愛情。劇集出街後，男女主角演技獲得好評，人氣急升。
《想見你》
大熱穿越台劇《想見你》由柯佳嬿、許光漢及施柏宇主演，劇情主要講述失去男友嘅黃雨萱（柯佳嬿飾）一直記掛對方，結果穿越回到過去，成為1998年嘅陳韻如。佢仲見到同去世男友生得一模一樣嘅李子維（許光漢飾）同好朋友莫俊傑（施柏宇飾）。因為回到過去，所以佢決定「現身」查出自己死亡真相，並嘗試改變過去及未來嘅命運。劇集爆紅嘅原因除咗係擁有穿越、校園、愛情及推理元素，當然唔少得男女主角嘅精湛演技，唔少觀眾睇完都話想劇集有續集。
《因為我們天生一對》（2gether: The Series）
如果要講今年最hit嘅泰劇，相信唔少人都話係BL劇《因為我們天生一對》。劇情主要講述Tine（Win飾）入大學後被Green（Gun飾）嘅猛烈追求，Tine就搵校園風雲人物Sarawat（Bright飾）去扮自己男友，希望可以擺脫Green，但其實Sarawat喺一次音樂會上就對Tine一見鍾情。劇中Bright及Win嘅CP感十足，佢哋亦憑劇集人氣爆升，成為新一代男神。
《半澤直樹2》
大熱日劇《半澤直樹》道出日本職場階級文化，成功引起唔少上班族共鳴。而續集喺相隔7年以原班人馬推出續集，劇情講述半澤直樹（堺雅人飾）被公司調任至子公司「東京中央證券」，擔任營業企劃部部長，不過佢就遇上更奸詐嘅同事及對手，延續職場戰爭。劇集出街後，深得海內外劇迷喜愛，收視節節上升，更成為「令和」年代收視最高日劇。
《屍戰朝鮮2》
由朱智勛、裴斗娜及柳承龍等人主演嘅《屍戰朝鮮》係Netflix首部韓國原創影集，除咗主角們精彩嘅演出之外，唔少觀眾都被喪屍逼真嘅演出震撼到，劇集大受好評。萬眾期待嘅續集喺今年3月出街，今季就講到喪屍係因溫度變化而活動，「王世子」李蒼（朱智勛飾）決定為保江山穩定而捨棄繼承王位，與「醫女」徐菲（裴斗娜飾）及永信（金成圭飾）等人尋求生死草內藏嘅秘密。喺大結局尾段，女神全智賢驚喜現身10秒，令唔少觀眾期待下一季嘅發展。
《紙房子》第四季 （Money Heist Season 4）
西班牙犯罪神劇《紙房子》，掀起全球煲劇熱潮，更成為最多人觀看嘅非英語劇集。劇中戴上達利面具及穿上紅色連身褲嘅搶匪，令人印象深刻。而今年4月播出嘅第4季繼續以搶劫案作主軸，講述搶匪們繼續留守銀行內，而警方亦逮捕咗「教授」女友兼前偵察官「里斯本」，雖然喺團隊嘅幫助下，成功逃脫及進入銀行內，但可惜嘅係奈洛比喺今輯犧牲咗，被甘迪亞向頭部開槍致死。最後督察Alicia發現「教授」嘅藏身之處，仲用槍指住「教授」，為第五季鋪路。
《梨泰院Class》
由朴敘俊、金多美及權娜拉等人主演嘅韓劇《梨泰院Class》，改編自韓國高人氣網路漫畫，播出後口碑好評不斷及收視節節上升，成為網上熱門討論話題。劇情講述朴世路（朴敘俊飾）父親被韓國頂尖飲食集團會長長子魯莽駕駛撞死，之後朴世路為咗報仇，努力儲錢喺梨泰院開酒館，對抗財閥。
《戀愛可以持續到天長地久》
大熱日劇《戀愛可以持續到天長地久》改篇自漫畫《將戀愛進行到底》，劇集由佐藤健及上白石萌音主演，講述女高中生佐倉七瀨（上白石萌音飾）因一次意外認識醫生天堂浬（佐藤健飾），之後佢仲鐘情於男方。佐倉為天堂決心成為護士並向天堂表白，雖然失敗咗，但隨著佐倉嘅熱情，令到性格獨特又孤僻嘅天堂軟化。劇集出街後，「天堂醫生」佐藤健人氣飆升，瞬間成為亞洲男神。
《艾蜜莉在巴黎》（Emily in Paris）
Lily Collins監製及主演嘅《艾蜜莉在巴黎》，喺Netflix一開播即成為熱門討論影集。劇情講述來自美國芝加哥嘅Emily（Lily Collins飾），因工作關係遠赴自己夢寐以求嘅巴黎。不過因為語言不通及文化衝突，令佢喺工作及愛情上充滿挑戰。劇集擁有高討論度，不過有部份網民認為劇集過於美化現實及有詆毀法國人之嫌。
《愛的迫降》
由「元祖男神」玄彬及「凍齡女神」孫藝珍主演嘅浪漫愛情韓劇《愛的迫降》，劇情主要講述南韓財閥尹世理（孫藝真飾），因一場滑翔傘意外而誤墜北韓，之後與北韓軍官利政赫（玄彬飾）展開一段南北韓秘密之戀。劇集除咗深受亞洲觀眾熱捧之外，連各地嘅藝人都因為呢套劇而瘋狂煲劇。
按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！
Download link: https://bit.ly/33oUdvq
