【回顧2020．娛樂】細數今年10位成功上位女星 蘇皓兒／何依婷／湯怡／陳欣妍…

2020年仲有唔夠1個月就完結，今年對唔少人嚟講係充滿挑戰嘅一年，因為新冠肺炎疫情嘅關係，各行各業都受到唔同程度嘅影響，娛樂圈當然不能倖免。不過逆境都要求存，今年有唔少女明星憑住努力，成功跑出獲得觀眾認同，例如蘇皓兒、何依婷、沈殷怡、陳欣妍及湯怡等等，仲有邊幾位？而家就同大家回顧今年10位人氣急升嘅女星啦！

蘇皓兒
前女子組合As One成員蘇皓兒（Chole），當年拍攝檸檬茶廣告時已獲網民留意。今年佢首度參與演出無綫劇集，喺《那些我愛過的人》中飾演林文龍個女姜子優。雖然佢已經26歲，不過喺劇中飾演中學生仍然青春逼人，加上不俗嘅演技，令佢成功入屋。

吳海昕
曾任空姐嘅吳海昕（Sofiee），因受電影《狂舞派》啟發而加入娛樂圈。有「民選港姐」之稱嘅吳海昕，14年參選港姐時被視為大熱，可惜最終三甲不入。之後佢去咗紐約修讀電影系，回港後為唔少節目擔任主持及參演唔少電視劇，例如港台《獅子山下2016》、《手語隨想曲6》及ViuTV《教束》等等。今年佢喺ViuTV愛情穿越劇《二月廿九》中飾演女主角張麗紗（Yeesa），演技令人眼前一亮，人氣急升。

何依婷
2017年港姐亞軍何依婷（Regina），憑甜美樣子深得網民喜愛，成為無綫新一代宅男女神。比同期港姐有更多機會嘅何依婷，上年除咗加入《學是學非》做「是非精」之外，更開始接拍劇集，今年就憑《機場特警》中飾演楊明嘅空姐兼網紅女友安安而人氣急升，劇中最令觀眾深刻嘅一定係著比堅尼洗車，唔少網民睇完都心心眼，仲大讚佢演技自然。早前，有傳無綫計劃翻拍經典劇集《十月初五的月光》，而女主角君好一角將由何依婷接棒，明顯備受力捧。

湯怡
湯怡喺2006年參加《美女廚房》嘅美少女廚神選舉而入行，當年因有「少女版黎姿」之稱，所以喺《寫意人生》被安排飾演黎姿嘅少女版。之後，佢就簽約成為英皇娛樂旗下藝人，主要以拍電影為主，直至前年佢終於憑《某日某月》首次擔正做女主角。今年佢喺《反黑路人甲》中演蘇芷珊一角，憑清純「眼鏡娘」形象人氣急升，更被網民話佢先係真正嘅「靚湯」。

蔡思韵
模特兒兼演員嘅蔡思韵（Cecilia），出道只有3年就已經備受關注，今年於港產電影《幻愛》首次擔正做女主角，演技令人眼前一亮。於早前《香港電影評論學會大獎》獲最佳女演員及《香港電影金像獎》最佳女主角提名。

鄧伊婷
曾經係女子組合Super Gear成員嘅鄧伊婷（Irina），入行以嚟星運一直都平平無奇，都係飾演閒角居多，直至今年喺《黃金有罪》飾演妓女Lulu及《迷網》飾演高海寧好朋友Brenda，搶fo成功，獲得網民關注，晉升成為無綫新一代「咪神」。

沈殷怡
沈殷怡喺ViuTV綜藝節目《辣伙頭》備受網民關注，與陳欣妍被網民封為「 Double S 」，佢更憑《美女郊遊遊》火速上位，成為新一代女神。之後，佢參與唔少節目及劇集拍攝，例如劇集《暖男爸爸》和《男排女將》、節目《貼身36》和《辣伙頭·開火》等等，人氣一直有增無減。

陳欣妍
出道只有4年嘅陳欣妍（Shirley）憑甜美樣子及標緻身材，成功俘虜一班網民心。今年2月喺ViuTV《辣伙頭》表現突出，與沈殷怡被封為「Double S」。之後，佢亦有參與綜藝節目《美女郊遊遊》 、《辣伙頭·開火》及《就係唔科學》拍攝，當中討論度最高嘅一定係喺《美女郊遊遊》著比堅尼行山。

陳詩欣
有「一件頭女神」之稱嘅陳詩欣（Eunice），喺2015年由模特兒轉型做歌手，但可惜發展麻麻。之後佢加入無綫做娛樂新聞主播，18年仲開始拍攝旅遊節目《3日2夜》，今年初更被安排加入《學是學非》做「是非精」。人氣急升嘅佢，上月宣布離開娛樂新聞台崗位，仲話未來將會主力拍攝節目《姊妹淘》同埋其他綜藝節目，唔知佢嚟緊會唔會有機會拍劇呢？

蔣家旻
唔經唔覺已經出道13年嘅蔣家旻，過往經常飾演少女時期或妹妹角色，乖乖女形象深入民心。雖然早幾年憑《愛·回家》馬子妮成功入屋，但之後發展未有突破，令其演藝事業浮浮沉沉。今年佢喺《反黑路人甲》一改以往清純形象，飾演冷艷又霸氣嘅夜場大家姐「水姐」，角色充滿新鮮感，演技令人眼前一亮。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！

Download link: https://bit.ly/33oUdvq