【Bookmark定】台灣桃園變天 全台最大水族館/超豪華戲院登場

講起台灣桃園，相信大家都會即時諗起「桃園國際機場」，作為香港人去台北必經之地，好多時都只係於機場上落機而已，但其實經多年嘅籌備，今個月開始桃園多個令人期待嘅景點及設施相繼落成，而且集中於同一地區，可以話一條龍式暢遊！桃園大變天，當疫症過後大家開始短途旅遊試水溫的話，去過太多次台北不妨轉玩桃園！

超強組合 三大景點同區開放

位處桃園高鐵站附近嘅「青埔」就係今次介紹嘅主角，三大景點包括Xpark、新光影城及和逸飯店一條龍式遊玩，形成一個最強旅遊地點！交通超方便，只要於桃園高鐵站或捷運站經行人天橋一條路直行10分鐘左右就到。無論係特登過桃園青埔玩，還是去台北時加入一、兩日行程，第二日一早就入機場都得！

日本公司營運 巨型水族館主題樂園

Xpark由負責營運日本多個水族館包括仙台、上越市水族館嘅「橫濱八景島」公司主理，8月7日正式開業！媒體報道開業入場人數達2萬人，非常厲害！佔地約15,000多平方公尺，內裡飼養共300多種海洋生物，包括首次於台灣飼養嘅麥哲倫企鵝、水豚、麻斑海豹、水母等，其中最大焦點為8公尺深、12公尺闊嘅超巨型水族缸，內有6千多條熱帶魚包括虎鮫鯊、丫髻鮫鯊等罕見鯊魚。館內設有咖啡廳Xcafe By PRONTO，以企鵝為主題，天花板設有透明水道連接企鵝水池，可以望到企鵝高速游過自己頭頂，非常特別！另一大賣點，就係動畫大師宮崎駿拍檔久石讓負責樂園中嘅背景音樂設計呢！

Xpark

地址：桃園市中壢區春德路105號

營業時間：10AM至9PM（假日至10PM）

按摩椅、頭等艙設計電影城兼商場

Xpark旁邊另一大景點就係「桃園新光影城」，同日一同開業。影城所有設施都超豪華，更以「飛機頭等艙」作為設計概念。影院中設有BOX影廳，當中有OSIM天王椅，及Sealy床褥作為座位，可以話係絕頂享受，如此舒適環境之下睇戲，真係要小心揀電影，隨時睡魔急Call呢！除咗舒適嘅座位之外，影城本身亦同時係一個超大美食廣場，提供一系列美食，院內有餐廳「頂呱呱 x 美國功夫茶」，提供期間限定「海綿寶寶」套餐，仲有其他多款美食包括企鵝竽泥包、德州牛扒、龍蝦麵線等十多間知名食店，真係唔去睇戲都可以入去醫肚！

桃園新光影城

地址：桃園市中壢區春德路107號

票價：BOX影廳戲票由800台幣起

海洋主題酒店 電視睇水族缸Live

玩完一日唔想急住走可以入住相鄰嘅全新酒店「COZZI Blu和逸飯店桃園館」，7月29日先正式開始試運。酒店配合Xpark以海洋作為主題，用上法國科幻小說《海底兩萬哩》作為藍本，由大堂至客房都見到海洋元素，貝殼燈飾、水母吊燈等。客房中地氈至牆身都用上海洋藍作為主色調，最特別係電視提供Live直播Xpark水族缸實況，真係可以話係《魚樂無窮》高級版！酒店共有218間房、10種不同房型，當中酒吧、餐廳都極具特色，模仿船艙設計嘅酒吧「Blu Bar」、海洋餐廳「Cozzi Market」，其中以露營作為主題嘅自助餐餐廳「逸．市集」更同日本知名露營品牌Snow Peak合作，使用大量Snow Peak用品及餐具，另有一番風味！

COZZI Blu和逸飯店桃園館

地址：桃園市中壢區春德路101號

預訂：按這裡