劉佩玥小三角色彈出 3個最強小三角色

近排劇集《幕後玩家》，一向做開乖乖女嘅劉佩玥，今次竟然做小三角色，同人夫Bosco激吻不特止，劇入面仲玩人前人後兩個樣添。雖然做小三角色向來都會被人鬧，但係有時候可能都係上位機會，因為個個都記得你。不如睇吓以下3個最令人印象深刻嘅小三角色：

李佳芯－《名門暗戰》余詩琳（Ivy）

Ali最近套《律政強人》就可以擔正做正義（好單純好不做做作）嘅女主角啦，但其實一開頭Ali都係做小三角色先上到位架。Ali喺劇集《名門暗戰》飾演嘅Ivy，一開頭就憑做岳華情婦成功就助理升做CEO，之後就勾引埋李天翔同黃浩然，仲同黃浩然要激烈床戰，同佢哋夾計陷害岳華謀佢身家。Ali樣靚身材正，戲入面勾引男人手段高明，壞女人形象入型入格。而Ali亦都憑呢個角色嶄露頭角，之後開始有份做較重要嘅角色，成功上位。

龔嘉欣 －《拳王》莊寶琪（Vicky）

《拳王》呢套劇除咗胡定欣啞女角色令人有深印象之外，龔嘉欣做嘅最強小三莊寶琪（Vicky）就真係令觀眾恨之入骨。點解咁講？因為呢個女仔一開頭爛玩濫藥不特止，仲以勾搭有婦之夫，破壞人哋夫妻關係為樂，甚至竟然想勾引自己姐夫黃德斌。勾引唔到就轉移目標去另一個人夫——黃浩然（點解佢成日有小三？？）。佢喺劇入面不停挑逗人夫上床，成功勾引到黃浩然之後就成日扮可憐扮委屈，等黃浩然唔信自己老婆唐詩詠。佢又講大話呃黃浩然有咗佢BB，但實際係第2個男人嘅。龔嘉欣將專登以拆散人家庭為樂嘅賤女人角色，發揮得淋漓盡致，令當時唔少師奶都要上論壇大鬧。不過新劇《幕後玩家》龔嘉欣就風水輪流轉，作為Bosco嘅老婆，安安分分打理好家事同夫家嘅家人，點知Bosco就出去偷食，呢啲可能就係報應啦。

湯盈盈 －《封神榜》柳琵琶

再講到最強小三，真係不得不提湯盈盈喺劇集《封神榜》飾演嘅柳琵琶啦。《封神榜》呢套劇最記得就係苑瓊丹飾演嘅殷十娘，明明佢打仗又叻，又幫老公李靖生咗3個仔，咁多年嚟在公在私都幫老公做咗唔少嘢。但之但係自從李靖娶咗湯盈盈做妾侍之後，就畀佢迷到「溫溫登登」，成日喺到搬弄是非，搞到李靖猜忌十娘唔畀佢上戰場。之後又成日花言巧語氹到奶奶同姨仔開開心心，甚至明明十娘無做錯都對佢指指點點。最後小三成功上位，地位仲高過正印，最後仲逼走埋十娘。呢個小三賤到咁，當然令到當時啲觀眾憎到佢死，搞到湯盈盈直至接到劇集《阿旺新傳》扮醜，先洗脫到狐狸精嘅形象。

圖片來源：TVB.com