44歲江芷妮早前秘密高齡誕囡考慮復出 自爆離開TVB原因

44歲江芷妮（Cherie）闊別娛樂圈後轉型經營美容生意，本身已育有2歲半囝囝嘅佢今年7月誕下囡囡，再次榮升做媽咪；久未喺熒幕露面嘅江芷妮近日就出席香港開電視全新節目《有種老闆娘》錄影，同主持人可宜分享創業心得。

江芷妮透露用咗12年時間打造「美容王國」，當初係因為貪靚而學做Facial、Body、整睫毛等等，開展美容生意，宜家共有兩間美容院，不時都會落舖；佢亦透露小朋友愈大，就想放多啲時間喺屋企，兩間美容院將來都會留畀一對仔女。江芷妮解釋當年離開TVB並退出娛樂圈，係因為自己危機感好重：「做我哋呢行，忙起上嚟會冇得瞓，但得閒嘅時候就真係好得閒，感覺好唔踏實，成日處於好被動嘅狀態咁，所以當時選擇出去學多啲嘢去增值自己，等自己有兩手準備。」江芷妮又指，都有留意近年娛樂圈，表示有睇《聲夢傳奇》及ViuTV《全民造星》，力讚呢類型節目可以湧現更多新人，令行業百花齊放。至於被問到會唔會復出，江芷妮就話可以考慮復出拍親子節目，講吓媽媽經、生B經及湊仔經。

提到早前與向海嵐、梁雪湄、黃𨥈瑩等昔日圈中好姊妹聚餐時，黃𨥈瑩抱住江芷妮囝囝，被誤會黃𨥈瑩已結婚產子一事，江芷妮就話黃𨥈瑩好鍾意小朋友，所以一得閒就會帶自己小朋友出去陪佢玩，但為保護好姊妹就唔肯向傳媒透露黃𨥈瑩任何感情狀況，相當老友。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！