52歲張文慈自爆登台曾被扯落台全身被摸勻 早年曾為生B雪卵

現年52嘅張文慈（Pinky）亞姐出身，先後效力亞視及TVB，不過佢喺2021年選擇長駐內地發展，努力經營直播帶貨、登台唱歌及出席商演活動等等。近日佢接受漢陽主持嘅電台節目《詩歌有Guide》訪問，期間自爆曾經喺登台時慘遭非禮，仲直言有「好羞辱嘅感覺」。

訪問中，張文慈表示自己喺入行前曾任模特兒及跑龍套，仲話自己拍過好多卡啦OK及喺唔少電影做過茄喱啡，例如《Beyond日記之莫欺少年窮》及《開心鬼放暑假》等等，之後佢就前往日本及美國升學，畢業後便回流香港參選亞姐。入行後，Pinky參與咗唔少經典劇集，好似有《我和殭屍有個約會》系列及《情陷夜中環》等等，令人留下深刻印象。而佢就憶述處女電影《黑獄斷腸歌之砌生豬肉》就係同影帝梁朝偉合作，當時嘅佢好緊張，所以唔敢望住梁朝偉對眼，搞到自己畀導演鬧。

近年張文慈經常四出登台，佢表示自己有唔少驚險嘅經歷，包括：「有年生日喺夜場登台，唱唱吓歌老闆推個蛋糕出嚟，全場同我慶祝，握手期間我畀人扯咗落台，當時着咗一條低胸露背裙，一仆向前就跌咗落人海裏面，好多隻手兜住我，托返我上去，你諗吓畀幾多人摸過我個身？我都唔知喊唔喊好，但人哋又唔係特登，只係好羞辱嘅感覺，最後都硬住頭皮唱埋落去，一半驚險又一半開心。」

同時張文慈仲試過被人跟蹤，佢就話：「原來架車跟蹤我哋，好彩有兩個交通警咁啱坐咗喺路邊，嗰架車見到兩個警察，即刻開車走，如果唔係嗰兩個警察，我可能已經畀人捉走咗。」

至於感情方面，年過50嘅張文慈至今仍未結婚，唔少網民都好關心佢嘅感情狀況。Pinky就表示自己拍拖嘅次數5隻手指都數得晒：「入咗行後都係2、3個，我以前好執著呀，好介意同好驚畀報紙寫，好驚有唔好影響，但而家咁大個冇乜所謂；信咗主後，唔會再為拍拖而拍拖，呢個年紀想搵個伴多啲，心態好隨緣。」另外，佢仲自爆早年曾雪卵，因為細個嘅時候好嚮往結婚生小朋友，但而家就冇呢個諗法，而揾男朋友同老公嘅條件亦都同之前唔同；佢就認為唔可以為結婚，而夾硬搵個人去生小朋友，現時嘅佢已經放棄呢個念頭，因為上帝早有準備。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！