60歲羅嘉良《家族榮耀之繼承者》造型被指殘過74歲許紹雄 演員陣容卡士超強
60歲羅嘉良北上發展多年,拍劇、參演綜藝節目、接內地商演及帶貨搵真銀。不過,近年多次被指身材走樣及疑似有脫髮危機,4月份到新疆烏魯木齊登台時更被拍到身材暴脹一整圈,幾乎掙爆西裝,讓網民紛紛慨嘆老到無咗明星相。久未於TVB出演新劇嘅羅嘉良有份參與7月開拍嘅劇集《家族榮耀之繼承者》,日前釋出一段幕後花絮,羅嘉良於片中以白髮造型亮相加上勁大個眼袋,顯得個樣好殘,老態盡現,被指當年男神崩壞,甚至仲殘過同劇76歲劉江及74歲許紹雄。
《家族榮耀之繼承者》由寰亞傳媒、優酷聯合出品,為《家族榮耀》延續之作,不過劇情與前作並無關係,故事由丘氏集團繼承者身份嘅爭奪展開,丘家孫女丘皓兒(佘詩曼飾)向來於家中不得勢,爭強好勝,認為自己有當繼承者嘅能力,不過集團創辦人丘家老太爺重男輕女。某日,丘老爺突然病重並留下一封委託丘皓兒全權代理集團主席工作嘅委託書,家中眾人對此感到質疑與阻撓,律師林峯力證委託書真實性,令佘詩曼成功接下代理主席一職;後來,丘老爺突然離世,留下一錘定音嘅遺書,令家族再次陷入爭鬥之中,相信播出時將會掀起一陣煲劇熱潮。
除咗劇情吸引,演出陣容亦極強大。官方於6月釋出演員名單,包括佘詩曼、林峯、羅子溢(前名:羅仲謙)、羅嘉良、梁靖琪、劉江、許紹雄、余安安、張鳳妮、龔慈恩、黃浩然、吳岱融、劉浩龍等演員,以及加入陳靜、陳瀅、王敏奕、梁諾妍等小花;今次亦係佘詩曼與林峯呢對最強CP相隔9年再合作,亦係第六度合作。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!