Babyface港男黃先生公開向《東張》女神示愛 梁敏巧：咁有市場邊襯得起你

TVB全新綜藝節目《呃錢》受騙者「Baby face」黃先生於節目內講出一句「Baby face，點會無市場？」，因而惹起熱議。近日，「Baby face」黃先生與林作拍片，公開向早前於節目訪問佢嘅東張女神梁敏巧（Maggie）示愛，直言要喺30日內追到對方。

日前，林作於社交平台分享與「Baby face」黃先生拍攝嘅短片，宣布「#babyface追東張maggie 30日大挑戰」正式開始：「我教佢宇宙吸引力法則，日日想著東張Maggie，就會心想事成！」，仲Hashtag埋梁敏巧，寫道：「佢會好努力咁證明俾你睇，佢係值得你擁有嘅BABY FACE」。從短片所見，「Baby face」黃先生被問到有幾鐘意梁敏巧，佢就自信地向鏡頭展示佢手機，用上梁敏巧嘅照片作屏幕照，更公開表示要追求對方：「我要媾Maggie，我要媾《東張》Maggie。我唔理，我要媾《東張》Maggie，我有《東張》Maggie使畀人呃？」隨後，又自爆對梁敏巧心動原因：「我貪佢夠高，我鐘意佢教瑜伽！」最後，林作建議「Baby face」黃先生減肥，但佢就仍相當有自信地表示唔想減肥：「我驚我減咗，好多人鐘意我，我會花心，對Maggie唔公平」。

就「Baby face」黃先生嘅表白，梁敏巧於接受媒體訪問時表示當日做完訪問就無聯絡，對方都無問過佢拎電話；直言睇完得啖笑，自覺襯佢唔起；事後，梁敏巧又於IG限時動態發布「Baby face」黃先生直言要追佢嘅截圖，寫道：「你咁健談又咁自信，仲有baby face 咁有市場邊襯得起你，你都係搵返個比我更優秀嘅女仔把啦」，續指：「不過，我都好多謝佢嘅欣賞，其實如果佢更努力做好自己，提升自己，一定會有好多女仔鍾意」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！