Beyond紀念演唱會有歌迷扮工作人員混入 大會公開狂迷八大瘋狂行為

今年係殿堂級樂隊Beyond成立40周年，同時亦係家駒逝世30周年，所以有音樂團體喺6月舉行咗一場紀念音樂會，而選址更係Beyond嘅誕生之地 － 中環堅道明愛社區中心，當日前經理人Leslie、劉志遠及黃貫中出席之外，演出嘉賓仲有Redholic X Cooper及享樂團等輪流演出Beyond歌曲以作致敬。

雖然音樂會當日順利舉行，不過噚日（27日）大會以「小心此人」為題出PO表示事後佢哋發現有人竟然偷取工作人員證，冒充工作人員進入音樂會場及後台地方，列出呢位人士嘅八大瘋狂行為：「1. 盜竊音樂會工作證，冒充工作人員。2. 盜取我們為工作人員準備的飯盒和飲品。3. 我們在演出前進行拜神儀式，他竟然夠膽一起上香。4. 盜取我們後台的飲品、生果盒給他在現場的數名朋友。5. 盜取多個演出人員工作証給其朋友。6. 盜取樂隊成員放在後台的iPad Pro。7. 盜取放在後台及演出嘉賓的Beyond Tee。 8. 更離譜的是在最後兩首歌曲演出時，他竟然冒充樂隊成員在台上一同大合唱，還企在正中間位置。」及表示因為有呢位人士嘅鏡頭太多，所以佢哋要花兩日嘅時間去剪走有佢出現過嘅鏡頭。另外，佢哋仲曾經聯絡過佢，而佢亦承認偷飯盒等嘅盜竊行為，願意作出部分賠償、並答應賠償剪輯工作額外費用及寫道歉信。不過後來因為聯絡唔到佢嘅關係，所以佢哋決定公開事件及到警署報案。

事件公開後，唔少網民都議論紛紛，並留言「實在太不可思議啦⋯⋯」、「佢好投入, 咁真係以為佢係工作人員」、「呢D人可能報警都唔驚，應該要搵東張西望同佢了解一下，睇佢拔足狂奔笑下都好」、「爛人一個！」、「未來再有類似的show，搵返一兩位成員去睇實個場。最好一男一女。同埋打得吓。咁樣可以減少發生同樣的事件。」、「咁兒戲」及「他表情好自然喔」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！