GinLee《告別煤氣燈》作曲人張運兒Yoona新歌唱出曖昧愛情苦澀味 MV初次與男主角親蜜互動勁尷尬

2024年樂壇新人、李幸倪Gin Lee〈告別煤氣燈〉作曲人張運兒Yoona，繼首支派台作品〈Hallucinate〉審視AI世代創作挑戰，第二首派台歌〈What am I looking for〉，透過即興創作、融合電影靈感與個人及友人經歷，喚起那些甜蜜心動卻矛盾的青澀回憶。

Yoona今次再夥拍音樂監製楊鎮邦Bryan創作第二首派台作品〈What am I looking for〉的曲詞，Yoona分享創作過程道：「寫完melody後，發現hook line有啲扭音，腦海中即刻彈出『遐想』呢兩隻字，Bryan又覺得幾得意，於是我哋就以呢兩隻字為基礎，去構思歌曲裡面嘅故事，同埋寫咗成首歌嘅歌詞出嚟。」然後故事便由此展開：她與他放學一起回家，聊著瑣事、分享夢想，眼神交會讓心跳加速。雖然彼此明知有好感，卻始終不敢戳破這層情感，讓甜蜜的遐想帶著一絲苦澀遺憾。

MV方面，Yoona這次又從影視作品中取得靈感。Yoona介紹道：「MV嘅故仔，係參考咗韓劇《W兩個世界》同埋電影《爆機自由仁》（Free Guy）兩套作品。我喺MV裡面係一套漫畫嘅女主角，每次喺畫室同男主角相遇，發生一啲甜蜜情景嘅時候，但轉個頭又調轉晒，回到最初。無論佢想點樣去改變個現實，佢都係每次同男主角發生曖昧情節之後，就會調返轉。我呢個角色改變唔到，就只可以喺自己美好嘅遐想 ，想像同男主角成為情侶的話，會係點呢？！」

充滿愛情元素的MV故事，自然有很多甜蜜場景，Yoona今次在MV 中與男主角的互動頻繁，也少不免親密鏡頭，但對於初入行的Yoona來說，拍這些畫面是一項極大的挑戰，Yoona說：「今次我第一次拍呢類型嘅愛情MV，之前未試過同一啲唔識嘅男仔有一啲好close嘅接觸，所以同男主角互動嗰陣都有啲尷尬，但導演同男主角非常專業，又有好多拍攝嘅經驗，可以帶我入戲同教我做表情，好似一開始喺畫室，有一啲不經意對望嘅shot，我要去代入女主角第一次見到男主角，好心動、心如鹿撞嘅感覺，男主角Mark都lead到我去演出心動嘅表情。」另外在戶外拍攝一些女主角自我幻想的遐想畫面，曖昧畫面就更多，Yoona都坦言：「嗰一下都幾怕醜，因為好少同啲唔熟嘅男仔拖手，仲要攬住，黐到咁近都好尷尬，好彩導演guide住我點樣代入做到既sweet又矛盾嘅感覺，令到拍攝過程都算非常順利。」

拍攝〈What am I looking for〉MV時正值盛夏8月尾的日子， 但當中卻有大量的戶外場口，Yoona都回憶道：「其中有一幕要我同男主角喺上水大水管附近互相追逐跑嚟跑去，為咗要拍攝好靚嘅畫面，成隊crew都熱到滴晒汗，cam man仲要托住勁重嘅器材一路追住我哋跑，喺唔同角度拍攝我哋最靚嘅一面，嗰一下我真係好感動，實在好多謝大家為咗我哋嘅作品，喺咁熱嘅情況都想盡力將件事做到最好，所以我都好開心，今次有咁專業嘅團隊，帶住我完成呢個拍攝。」