MIRROR單飛6子 姜濤 盧瀚霆 柳應廷 呂爵安 陳卓賢 江𤒹生 暑假開個唱 全團再合體開show

（4／27更新）尋日傳出MIRROR 4子將會喺今年舉行個人演唱會後，唔少fans都認為唱作實力一流嘅陳卓賢（Ian），以及另一人氣成員江𤒹生(AK)都值得開個唱。今日有傳媒爆出，原來Ian 同AK都會喺今年以個人身份舉行演唱會，但暫時未知檔期、場數及地點。MIRROR所屬公司Makerville回應傳媒查詢時表示，6位成員嘅個唱以及MIRROR團隊演唱會嘅詳情，將於稍後公布。Ian同AK今年已經確定喺5月，將會同另一女歌手陳蕾，喺機場博覽館為商台「拉闊音樂會」演唱。

MIRROR去年首個紅館個唱發生墮屏意外，令舞蹈員阿Mo（李啟言）身受重傷，個唱亦要腰斬。事故對人氣起飛嘅MIRROR構成打擊，就連參與舞台演出都有壓力。

今日有傳媒就報導，MIRROR所屬公司有意為4位成員姜濤、盧瀚霆(Anson Lo)、柳應廷(Jer）及呂爵安(Edan)喺今個夏天開個唱，每人暫定2至3場。消息指，全隊歌唱實力最強嘅Jer會打頭陣，7月初喺九展Star Hall開三場音樂會。

而其餘三人將會喺機場博覽館舉行個唱，年初贏得一人一票投選嘅「叱咤樂壇我最喜愛的男歌手」得主Anson Lo會接力喺7月底開3場show；

人氣強勁嘅姜濤會緊隨其後喺8月初同樣開3場，而Edan就會壓軸喺8月尾開2場個唱。

至於其他同樣有叫座力嘅單飛成員陳卓賢(Ian)、江爗生(AK)及李駿傑(Jeremy），就暫時未有個唱消息。報導又指，4子完成個唱後，將會歸隊為MIRROR喺今年稍後舉行嘅團隊演唱會準備。暫時未知MIRROR演唱會舉行場地，外界尤其關心12子會否再踏紅館，定係轉去其他大型場地如機場博覽館或中環海濱。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！