One Love Asia Festival|日期地點全更改 演出陣容打亂兼換人 網民不滿:係咪玩X我地
由IMC Live Global舉辦嘅「One Love Asia Festival」音樂節首次登陸香港,一連三日嘅音樂節原定喺本月21至23日,假中環海濱活動空間舉行,不過大會噚日(3日)喺社交網站宣布由於近期香港天氣不穩,影響觀眾嘅戶外活動體驗,所以決定將音樂節移師到室內嘅亞洲國際博覽館Runway 11舉行,而舉行日期亦改為6月29日至7月1日。
「One Love Asia Festival」雲集多位本地及海外歌手,每組藝人輪流上陣,為觀眾帶嚟無間斷嘅精彩娛樂體驗,但由於改期兼改地點,導致影響歌手嘅演出陣容,原定嘅孫燕姿、徐佳瑩及動力火車未能參與演出,由容祖兒、Gareth.T湯令山及理想混蛋取代演出,最新演出歌手陣容如下:
6月29日:SICA & WINWIN 楊安妮、NICKTHEREAL 周湯豪、HEBE 田馥甄、SHOW LO 羅志祥、JOEY YUNG 容祖兒
6月30日:BESTTARDS 理想混蛋、 AGA 江海迦、WEIBIRD 韋禮安、GARETH.T湯令山、ANSON LO @ MIRROR、JER LAU @ MIRROR、JEREMY LEE @ MIRROR、KEUNG TO @ MIRROR
7月1日:VIVA、JANICE YAN 閻奕格、831 八三夭、EVE AI 艾怡良、RUBBERBAND、HINS CHEUNG 張敬軒
另外,大會亦持票人嘅選擇,持票人可選擇保留門票、申請更改門票及申請全額退款。
消息公佈後,唔少網民都紛紛留言表示不滿,例如「香港夏天都係會打風落雨,搞一個戶外event前無做資料搜集? 十幾日前先突然醒覺怕落雨去改期去室內? 6月21號開show,咁遲先決定改期,影響幾多人要請假、訂機票酒店? 仲有改期後有d嘉賓嚟唔到,影響幾多買飛嘅人?」、「而家唔只係由其他表演嘉賓補上,直頭洗牌喎? 本來day 1想睇嘅三組嘉賓比你打散晒分開三日」、「我相信有唔少人係要特登請假甚至要訂機票返黎睇,主辦你地6月頭個個出晒更表買晒機票先話改期係咪玩X我地?3日嘉賓大洗牌又咩玩法??」、「香港天氣年年都係咁,你哋今日先知六月會落雨?有冇考慮過改期對觀眾嘅影響?日期地點lineup全改係咩玩法?」、「香港:水魚之都」、「有冇攪錯,而家你地單方面改期改地點改表演者乜都打亂晒,但就限死人地啲飛要全留,全改,全退,唔可以部分作出不同安排,臨急臨忘你要人點處理????」、「主辦,你都好離譜啫,收嘅票錢唔算少,無得坐?香港人係唔慣睇呢啲咁樣嘅show㗎,表演時企足全程已經成幾個鐘,入場之前又要排隊等位又幾個鐘,睇一日至少企五六個鐘?如果三日咪十幾廿個鐘,腳都跛喇,你自己睇埋佢啦!」、「不知所謂嘅更改,本身買咗睇Mirror,而家比你地改到唔係睇佢,真心對你地公司失望。一心想睇自己喜愛嘅歌手,而家變成睇其他」及「我買的是想睇羅志祥,我23號既飛竟然唔係睇返羅志祥,玩呀」等等。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!