PR都可以變劇集？盤點以往取材過的特別職業

「關公災難」就講得多，公關呢個職業到底做咩好多人都唔清楚。而大台近嚟就有套新劇《幕後玩家》專講公關，畀大家了解吓呢行到底做咩。不過大台拍親職業劇都總係被人插同現實不符，呢套會唔會又出事呢？其實大台都成日搵特別職業嚟拍劇，就好似以下呢3套劇集咁：

魚躍在花見－壽司師傅

《魚躍在花見》呢套劇當年有兩大花旦楊怡同胡杏兒，又有張智霖同謝天華，仲遠赴日本取景，真係睇人睇景都值啦。最特別之處，在於呢套劇係講壽司師傅，壽司我哋就食得多，壽司點整又真係無咩點留意，更不要說壽司師傅啦。其實要成為壽司師傅一啲都唔易，呢套劇都有講到，食材點樣處理，溫度高啲低啲都唔得，刀功更加非常重要，特別係整雞泡魚刺身，稍有不慎就會令人食物中毒致死。所以《魚躍在花見》講壽司師傅呢種喺日本受到非常尊重嘅職業都幾特別，雖然我最記得都係某某壽司專門店嘅贊助⋯⋯

ID精英－入境處

紀律部隊成日都拍架啦，不過通常唔係警察（仲要特別係重案組）就係消防員，你唔悶我都厭啦。2008年呢套《ID精英》就一反傳統，揀咗入境處呢個聽落就無咩緊張刺激感嘅紀律部隊做題材。郭晉安飾演嘅方浚杰就係總入境事務助理，後來就加入埋入境處調查組，揭發咗多個不法入境事件例如假結婚事件、假證件集團、偷運人蛇集團等等。呢套劇一聽本來以為幾悶吓，但睇睇吓先發現入境處幾重要，唔係有佢哋把關，真係咩人都可以偷偷嚟香港，好似查假結婚，唔貼身追查其實都幾難知。

純熟意外－保險意外調查員

不時聽到啲新聞揭發啲人呃保險，啲查案劇集都總係有一單係原本以為係意外，點知發現原來死者死之前另一半幫佢買咗人壽保險，再揭發係一單謀殺案。不過到底啲保險公司點知你係咪呃佢？咪就係請人返嚟查，老實講呢套劇之前，真係無留意保險意外調查員呢個職業。蔡思貝飾演嘅殷然，就憑住心思細密同分析，好容易就發現所有意外嘅疑點，揭發啲人呃保險。呢套劇其實係咪想同大家講無咁容易呃保險呢？雖然套劇後來走上奇怪嘅方向，但至少都被大家認識一個陌生嘅行業，同埋同大家講claim保險都唔係咁易架～

嚟緊仲有咩特別職業好拍？

殯儀行業－講真中國人成日覺得白事係禁忌，拍吓呢種題材先可以令更多人了解其實佢哋幾值得尊重；

立法會議員－睇吓建制、泛民點樣表裡不一，再影射吓現實政治人物，實好高收視，之前港視嘅《選戰》，美劇《House of Cards》都係例子；

音樂家－宜家個個小朋友都識幾種樂器，拍返套港版《交響情人夢》，再搵葉詠詩客串做拍揮家，等大家都知香港都可以出到著名音樂家！

圖片來源：TVB.com