So Ching退團︳一舉一動被關注 曾被傳取消追蹤阿Mo好友Anson Lo

女團COLLAR所屬公司MakerVille今日突然通知傳媒，下午3點將舉行記者會交代COLLAR最新動向。而COLLAR成員So Ching(蘇芷晴）亦在IG發文宣布退團。

自從去年MIRROR紅館演唱會發生屏幕墮下事故，So Ching嘅舞蹈員男友阿Mo（李啟言）不幸被擊中受重傷後，外界除咗關心阿Mo嘅康復情況，亦十分擔心So Ching。有份演出MIRROR演唱會嘅舞者，曾於去年9月同阿Mo家人及So Ching見面，有在場嘅舞者事後形容So Ching暴瘦，令人心痛。COLLAR以至So Ching都停工一輪，直至商台嘅叱咤頒獎禮先至再見到齊人出場。當日So Ching首次親口向傳媒交代阿Mo現況。

外界同時透過So Ching社交平台得知佢嘅狀況，但亦因此引起討論。So Ching曾轉貼批評演唱會主辦方無視安全問題嘅文章，而MIRROR去年十月再次推出新歌當日，So Ching咁啱都喺IG 出Story寫上「世界變了樣」，有網民就此批評So Ching放負。另外有傳媒曾經報導，So Ching喺事故後取消關注MakerVille高層魯庭暉、MIRROR經理人花姐（黃慧君）等人嘅IG帳戶，仲發現So Ching並無追蹤同阿Mo相識多年嘅MIRROR成員Anson Lo盧瀚霆嘅帳戶，不過未能證實係事故後取消關注，定係一路都冇follow。

早前So Ching並無同COLLAR出席嘅CHILL CLUB頒獎禮上，Anson Lo就奪得男歌手金獎。教主同阿Mo早於大學迎新營就認識，後來2個人一齊加入舞蹈學會，並且先後成為全職舞者同舞蹈教師，更加一齊參加《全民造星》。即使Anson Lo成為藝人，同阿Mo友情依然，教主唔少MV同演出都搵阿Mo一齊跳舞。而事故發生後，Anson Lo喺再踏台板演出同接受圍訪時都試過情緒激動淚。但係教主去年底承認，因為阿Mo家人未準備好等原因，佢仍然未有機會探望好兄弟，並透露同So Ching冇直接聯絡，要靠公司去溝通。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！