TVB閃現不安靈異畫面惹熱議 嚇親網民：冇頭冇尾嚇死人

喺噚晚（9日）大約11點15分，翡翠台播映J2節目《玲玲有情報》預告時，突然變得詭異及閃現靈異影片，之後網民隨即喺討論區出PO討論，唔少人表示嚇親兼以為自己撞鬼。《Yahoo 娛樂圈》據消息指，相關靈異影片為新節目宣傳之一。

翡翠台喺播放J2節目《玲玲有情報》預告時，畫面變得異常詭異，之後就播出一段只有數秒嘅黑白靈異影片，影片中有一個鞦韆，之後就有一個頭髮凌亂嘅紅衣女鬼身影閃現。去到大約零時零分時，翡翠台竟然再播出靈異畫面，不過今次就係一個工廠大廈嘅背景，燈火不停閃爍，而電梯門亦慢慢打開，之後突然彈出一個人影。

兩段靈異影片出街後，引起觀眾不安及恐懼，並喺網上掀起討論，有人估計呢個係新節目嘅宣傳手法，但又未有寫上任何宣傳字眼，不過大部份網民都被影片嚇親，留言話「我都見到 有隻女鬼起到」、「我都嚇親」、「嚇到我今晚訓唔著」、「見到，心諗搞乜鬼」、「玲玲有情報——就跳咗畫面」、「無任何廣告作用，無任何宣傳效果，仲要完全唔係TVB一向風格」、「冇睇依個po真係會以為自己撞鬼 嚇親d阿公阿婆」、「集體撞鬼」、「投訴得 嚇到我屋企班細路喊晒」、「冇頭冇尾嚇死人」及「係咪三體人嚟啦」等等。

據消息指，相關靈異影片其實為梁思浩即將主持新靈異節目嘅宣傳之一。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！