UNi 新女團發布會跳唱表演成網民熱話 保錡@ERROR留言話「被殺了」 IG直播因為咁而開唔成？

MIRROR大紅令香港多返好多偶像團體，女團差唔多係一年一隊，COLLAR、Lolly Talk、Beanies以至今年出道嘅VIVA之外，早兩日一隊聲稱係「由夢想少女全自資獨立創作音樂女團」嘅UNi，喺尖沙咀一個商場舉行出道發布會，宣布正式殺入樂壇。

出道見人梗係要跳唱啦，UNi喺活動上演唱首支派台歌NOW，有現場觀眾喺社交平台形容UNi嘅演出「一開聲，簡直係…… 要乜有乜！啲舞步，四個成功做到唔同步！佩服！好伏！」，仲有觀眾拍埋片分享。呢期喺社交平台幾活躍嘅ERROR成員保錡都有就UNi演出留言，三個字「被殺了」！

UNi出道發布會都有唔少笑位，首先活動上有切乳豬環節，司儀話係寓意4位成員大紅大紫……而原來UNi嘅IG本來有直播今次活動，但後來UNi嘅IG管理員話因為手機爆數據而無法進行，唉呀乜咁唔小心。

女團UNi 4位成員包括Yammi彤彤、SZECHING思澄、Silver和Seeing，佢地表示UNi係全自資女團，由歌曲製作到編舞都係佢地一手包辦。不過喺出道前UNi成員Ariels張瑞芝以個人理由宣布退團，Ariels後來同UNi更出現法律糾紛。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！