《中年好聲音2》十強誕生 鄭梓浩陳燕娜被淘汰 林若盈又喊被網友叫「苦盈」

TVB綜藝節目《中年好聲音2》周日晚播出十二強淘汰賽下半場，今集節目淘汰2位參賽。呢回合比賽以「雙語之歌」為主題，參賽者要唱出同一旋律兩種語言嘅歌，得分最低選手會跌入危險區。上集出場參賽者當中，陳俞霏及鄭梓浩暫時得分最低，處於淘汰邊緣。

今集出場之中，因為經常喺節目中流淚嘅林若盈被網友戲稱為「苦盈」，而林若盈今集分享個人經歷，提到早年喺台灣參加歌唱比賽後，本來有機會出道，但因為屋企出現經濟問題而迫住要放棄一切返香港。林若盈直認唔甘心，但即使重頭嚟過佢都會選擇返屋企，若盈又話媽媽為家庭都有好大犧牲，屋企曾經被追債，佢地一家甚至試過聽到有人行過屋企門口就閂細電視聲。林若盈可能都知被網友批評，講到屋企事時本來想喊，但佢都忍住，仲話「啲人又話我喊㗎喇」。結果林若盈嘅演出有83分，跌入危險區。

但係最後2位出場嘅陳蒨葶同陳燕娜，表現都唔算突出。陳蒨葶以暗黑唱腔演繹楊千嬅《小城大事》，但評判之一周國豐認為即使陳蒨葶對歌曲理解正確而且唱得夠慘，但觸動唔到佢。而陳燕娜就揀咗王菲嘅《原諒自己》，因為佢係聽到呢首歌而愛上王菲，不過連主持車婉婉都話「揀王菲嘅歌好易出事」，而評判都認為陳燕娜應該揀更有把握嘅歌。

結果陳蒨葶同陳燕娜同樣得到82分，與83分嘅鄭梓浩一齊處於危險區等待評判決定。最後陳蒨葶有得留低，曾於90年代出道成為歌手嘅鄭梓浩，以及參加過《亞洲星光大道3》嘅陳燕娜同時「畢業」。至於今集MVP就有古淖文奪得。

《中年好聲音2》十強人馬分別係陳俞霏、古淖文、黃劍文、劉威煌、沈宗賢、安雅希、顏米羔、林若盈、譚輝智及陳蒨葶。由呢回合開始比賽進入名次積分賽制，按表演得分排名，從而決定每集淘汰人選及決賽人馬，呢round演出最高分嘅會得到12分，MVP再加2分。古淖文以14分暫時領先，劉威煌及顏米羔排第2及3。而下一回合就會由十強同《聲夢傳奇》學員合唱。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！