《中年好聲音2》爆賄選疑雲？網上短訊聲稱投票撐顏米羔可換免費按摩

TVB綜藝《中年好聲音2》今個周日晚舉行決賽《中年好聲音2之登峯之戰》，並公布當晚除咗繼續有肥媽、張佳添、陳慧嫻、伍仲衡、周國豐之外，仲會加埋楊千嬅擔任嘉賓評審，而表演嘉賓更邀得台灣天后蔡琴演出。7強人馬古淖文、安雅希、譚輝智、顏米羔、黃劍文、沈宗賢及陳俞霏將角逐《中年好聲音2》金、銀、銅獎，以及由觀眾網上投選嘅「觀眾最愛好聲音」。

近年唔少頒獎禮同選秀節目都傳出fans為撐偶像而用錢「換取」選票，例如開多個電話號碼等，務求幫偶像盡做。有傳媒聲稱收到讀者爆料，指有人自稱係三甲大熱顏米羔嘅「好兄弟」，喺網上群組發訊息為顏米羔拉票。報導更指呢位顏米羔嘅好友，叫大家喺網上投票支持顏米羔之後，可以憑螢幕截圖作證明，換取價值280元嘅「撥筋肩頸按摩」一次，呢位「好兄弟」仲貼上《中年好聲音2》Whatsapp頻道同TVB官方投票link，方便朋友撐場，不過咁做似有賄選之嫌喎！暫時顏米羔同TVB都未有就報導作回應。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！