《九龍城寨之圍城》伍允龍演反派人氣急升 舊愛鍾嘉欣大讚係筍盤：I am very happy for him

電影《九龍城寨之圍城》於5月1日香港內地同日上畫，票房走勢持續凌厲，直至噚日（27日)票房錄得$82,513,009，榮登香港電影史上華語電影總票房第2位，認真厲害。伍允龍喺電影中飾演「奸角」王九打得出色而人氣急升，早前佢仲喺宣傳時表示舊愛鍾嘉欣喺香港期間都有入場支持佢，而鍾嘉欣就喺出席品牌活動時亦表示戥佢高興。

鍾嘉欣就表示《九龍城寨之圍城》好正：「呢套電影真係A++++，因為每一個演員都做得好好，同埋我每一個角色都鍾意，打得好有型，又有香港嘅情懷...大家要多多支持。」 佢仲戥舊愛伍允龍高興：「我替佢好高興呀，我覺得呢個造型好啱佢，同埋成件事佢做出嚟係好自然好放，佢遇到一個好好嘅角色，我替佢開心，因為我知道呢個係佢夢想嚟㗎，希望佢可以拍多啲唔同嘅動作片，I am very happy for him。」

之後，被問到二人係唔係仲有聯絡，鍾嘉欣就話少，但有時會透過社交網站保持聯絡。伍允龍曾經被指係無名小卒，如今終於吐氣揚眉，鍾嘉欣就表示：「我覺得佢一直都有價值，努力總會有成果，好似我咁好期待自己嘅未來十年，我亦好期待佢嘅未來十年，我覺得會好精彩，同埋我替佢好高興。」

《九龍城寨之圍城》早前宣布開拍前傳與終章兩部作品，鍾嘉欣即刻表示好想演，仲自薦表示自己都打得，並樂意與伍允龍合作演戲。最後，被問到伍允龍嘅感情，佢就話好希望佢可以快啲搵到另一半，因為佢係一個好男仔，係一個筍盤。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！