《亞洲超星團》愛合竟然撞樣《愛·回家》女裝金城安 網民：真的不是本人去的嗎

TVB全新偶像選秀節目《亞洲超星團》喺上月25日首播，節目邀請亞洲舞王Rain擔任節目總製作人，並搵嚟農夫、蘇志威、程瀟及朱正廷擔任超星導師，更雲集65位來自內地、香港、澳門、台灣、日本及韓國等地嘅「超星練習生」，致力打造一隊具影響力嘅7人限定男子組合。日前節目已經播出第二集，當中有位素人出身嘅參賽者，竟然被指同《愛‧回家之開心速遞》男扮女裝嘅金城安（周嘉洛飾）撞咗樣。

節目嚟到第二集，繼續係初舞台才藝考核，除咗「票王」奧利、香港代表丁子朗、張鎬濂及方玉亨矚目登場之外，擁有1.88高挑身形及混血兒精緻外貌嘅內地代表愛合（Albert）同樣搶鏡。現年20歲嘅愛合，曾被指似BLACKPINK成員Lisa，不過佢就搞笑回應話唔好侮辱佢嘅Lisa，佢喺第二集就與艾煜坤、黃輝雄及楊亦辰組成「美杜莎」組，女生男相嘅佢化上濃艷嘅妝容，以性感嫵媚嘅舞姿，成功吸引評判及觀眾嘅注意。

節目播出後，唔少網民都覺得佢同《愛‧回家之開心速遞》男扮女裝嘅金城安（周嘉洛飾）好似樣，紛紛留言話「原來不止我一個這麼認為」、「真的很似，但他是新疆人」、「驟眼睇真以為金城安」、「就係，島大徐子珊啊」、「真的不是本人去的嗎」、「救命，呢個真係似十足」、「以為係愛回家劇情」及「我睇嘅時候就話，金城安喺度做咩」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！