《伙記辦大事》噚晚首播 三大主角加埋162歲網民嫌老

無綫新劇《伙記辦大事》喺噚晚（12日）首播，搵嚟「收視福將」歐陽震華、馬德鐘、萬綺雯、陳瀅及楊明等人主演，首集就講到G4負責護送外國政要，期間政要私會情人被記者追蹤，歐陽聰（歐陽震華飾）識破記者詭計，成功化解公關危機，更成為升職嘅首要人選。原本歐陽聰諗住自己可以擊敗競爭對手蒙狄克（何啟南飾），可惜突然殺出前女友孔慧心（楊卓娜飾）嘅女兒常笑（陳瀅飾）到警局報復，令佢嘅上司大為不滿，結果升職夢碎。其後遇上高級警司郭強（張國強飾），力邀佢調職去東九龍交通部。想知網民們睇完有咩感受，快啲轆落去睇下啦！

劇情沉悶
劇集標榜係關於警匪及律政嘅喜劇，但以第一集嚟講就暫時未有太多嘅笑話。另外，喺首集開頭嘅時候，仲有關公同馬突然出現。唔少網民睇完都狠批悶場，留言話：「第一集麻麻地，開頭又關公又騎馬，想幽默又唔幽默，尷尷尬尬」、「第一集, 差」及「第一集好悶，完全冇戲味」等等。

好多《開心速遞》演員
唔少網民都留意到《伙記辦大事》有見到多位《愛·回家之開心速遞》嘅演員參與，劇集一共有32集，但單單噚晚首集就已經「John」何啟南、「馬漢」衛志豪、「KC」歐瑞偉、「Andy」崔錦棠、「李莫仇」張詩欣及「朱展」陳嘉輝等等，之後仲會有「Helen」姚瑩瑩、「Rebecca」沈可欣、「Ivan」鄧永健及「Laptop」孟希璘等等。

楊明飾交通警欠說服力
有醉駕前科楊明，喺上年再有交通意外嘅案件，現正保釋候審。而楊明喺《伙記辦大事》中飾演交通警秦永熙，令到唔少網民都認為欠缺說服力，紛紛留言話：「飾演交通警，現實世界就醉駕。」、「醉駕明演交通警員 … 會唔會太過諷刺 ！？」及「做交通警，真有說服力」等等。

歐陽震華入型入格
噚晚劇情主要交代歐陽震華飾演嘅歐陽聰係一個聰明、具有高度嘅洞察力及邏輯思維能力嘅警隊精英。睇完噚晚嗰集之後，唔少網民都大讚佢，留言話：「波比戴黑超，又法證上身，形象太深。」、「噚晚一個歐陽震華已經夠撐成套，馬德鐘仲未出，出埋冇得揮﹗」、「Bobby真係做咩專業人士都入型入格」、「歐陽震華果然撐到埸，男一唔係個個都做到」及「我覺得OK呀！歐陽震華的角色咀賤得來好笑！我喜歡這個角色設定。」等等。

主角太老
劇集由歐陽震華、馬德鐘及萬綺雯擔正，不過有網民就嫌佢哋年紀太大，與同時間播出嘅ViuTV《無限斜棟有限公司》嘅主角陳卓賢（Ian）、盧慧敏及黃定謙年紀相差一大截。睇返資料，《伙記辦大事》嘅三位主角年齡加埋已經162歲，而《無限斜棟有限公司》嘅三位主角年齡加埋只有79歲。難怪網民都留言話「3個主角加埋162歲，多隔離台成倍，仲要老人多角戀」及「Tvb拖到人地30幾40歲結埋婚先至俾佢地做主角」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！