《愛回家》「西就」嘉駿疑似撞鬼 剃頭轉運立即有工開「唔到你唔信邪」

《愛．回家之開心速遞》收視keep住好，令劇中綠葉都多人認識。飾演尋寶圖店員「西就」嘅嘉駿原來已經入行25年，近排佢喺社交平台post片，片中佢搵髮型師毅然將頭髮剷短，仲話「看破紅塵！削髮為僧！」，令網民都想知發生咩事。三日後嘉駿再次出post解釋做咩剷青，原來背後有段靈異故仔！

嘉駿話有人以為佢剷青係因為拍新劇，又或者為情所困。但佢寫道「其實我自從1月拍完《非份之罪》後，我自己同身邊既人都覺得我臉色唔好，我自己覺得我無左精氣神，上禮拜係台灣又見到野，而我已經好幾年長頭髮，而啲頭髮一直都遮住我額頭，所以把心一橫鏟曬佢，將嗰所謂印堂露返出黎！」。

見到野？嘉駿同傳媒講，佢自細就有陰陽眼，所以見到「朋友仔」都唔太驚，不過近排又見返喇。如嘉駿所講，新年前後已經覺得唔太精神，就連喺電視城偶遇撞見嘅偶像陳慧嫻，都覺得佢氣色唔好，於是嘉駿把心一橫剷頭。

巧合在，嘉駿發帖文話「鏟左唔夠72小時，今日就有好消息！黎緊我將會拍攝《麻雀樂團》 。所以，唔到你唔信邪」，更附上幕後搵佢返TVB試造型嘅通話截圖。《麻雀樂團》正正係由視帝視后李佳芯同譚俊彥主演嘅新劇，早前傳過3月底開工。嘉駿1999年喺TVB藝訓班畢業，同屆同學有林峯、楊茜堯（楊怡）、楊明等。喺TVB工作5年後，嘉駿考入北京電影學院表演系，成為該系首位香港學生。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！