《愛‧回家之開心速遞》張明偉宣布離開劇組：有緣再見

無綫處境劇《愛‧回家之開心速遞》收視及口碑不俗，唔少藝員更憑劇中角色成功入屋，當中包括飾演補習天王佐治George嘅張明偉（Aaryn）。噚日（27日）佢喺IG發文宣布離開劇組，唔少網民仲留言表示不捨。

張明偉喺戲內戲外都係資優生，戲內嘅George一頭亂髮勁搶眼，佢除咗非常聰明及操得一口流利英語之外，仲好有生意頭腦，與熊心如（蘇韻姿飾）創辦天才聯盟補習社。至於感情方面，佢曾經暗戀熊心如，不過最令觀眾印象深刻嘅一定係佢同池子孝（阮政峰飾）大玩HeHe情。但佢噚日喺IG上載多張討論區截圖並留言宣布離開劇組：「我一直好想講……其實我做George不知不覺3年有多，一路都有follow大家嘅留言。無論好同壞，都俾咗好多靈感同意見我思考點樣進步，務求令呢個角色有娛樂性而且夠貼地。衷心多謝你地每一位支持，希望大家日後留意我其他作品討論，有緣再見」。喺劇中飾演「送水輝」嘅許家傑就留言：「江湖見喇」，其他網民亦紛紛留言表示不捨及叫佢加油，例如「期待你係cctvb 完約嘅一日，你值得擁有更多更好嘅機會，加油呀」、「走得快，好世界 其實我喜歡睇你同阿孝對手戲 不過前途要緊，加油」、「jesus!你去邊啊」、「非常之好嘅選擇，希望你快啲離開tvb 加入ViuTV」、「支持你！你起音樂發展應該會更好」及「咁突然？！唔捨得佐治你呀……」等等。

31歲嘅張明偉，於加州大學洛杉磯分校（UCLA）傳理系畢業，之後就加入無綫做《今日VIP》和《港生活．港享受 》PA（助理編導），後來節目監製瑪莉引薦佢入讀2011年25期訓練班，開始其幕前生涯。雖然佢星運平平，經常飾演一啲唔起眼嘅閒角，不過佢都冇放棄，選擇繼續堅持追夢。直至George呢個角色嘅出現，令佢開始為人熟悉。除咗演戲之外，張明偉非常熱愛音樂，佢喺2013年參加《星夢傳奇》，雖然未能殺入五強，不過亦令觀眾印象深刻。擅長作曲、唱歌、結他及彈琴嘅佢，現時係樂隊Charming Way嘅主音及結他手，佢仲經常上載創作及翻唱歌曲到影片頻道同大家分享。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！