雅虎香港新聞 《愛美麗狂想曲》陳豪演技再被彈 細數近年陳豪令人混淆角色
當年憑住《溏心風暴》獲得視帝嘅陳豪，近年有唔少網民都對佢演技劣評，直插佢愈做愈hea、回晒塘、不斷退步及演技過於浮誇等等。有網民嘗試幫佢澄清，因為陳豪近年接拍嘅角色大同小異，所以都係用咗同樣嘅演繹方法，即係Chok樣同成日講走音英文。而家就同大家一齊回顧近年陳豪令觀眾混淆嘅角色啦！
《愛美麗狂想曲》
《愛美麗狂想曲》正在熱播中，陳豪喺劇中飾演天睿公關公司行政總裁「Matt少」麥子風，與李佳芯飾演嘅阿Me有感情綫，由開頭對下屬要求高，到後來變咗一個幫下屬嘅老闆。佢講嘢成日中英夾雜，口頭禪係「God! Damn it.」。佢嘅造型都係整齊恤衫西褲及馬甲背心，一般成功人士咁。
《陀槍師姐2021》
早前播出嘅《陀槍師姐2021》, 陳豪飾演「蒙漢森」，本身係一名自大目中無人嘅飛虎隊警察，後來調去懸案小組，對下屬極其嚴厲，因此不受下屬歡迎，佢又係有句口頭禪「Best of the best」。
《殺手》
上年播出嘅《殺手》，收視口碑都唔錯，而陳豪飾演頂級殺手喬星（Zero），表面上是一名Cafe老闆，實際上係一名自大冷血嘅職業殺手。劇中同李佳芯有感情線，同樣會無端端走音講英文。佢都係成日著休閒西裝，加上chok樣。
《誇世代》
喺《誇世代》中陳豪飾演鄺港生（Mike），又係同李佳芯飾演一對。本來係想為滅門向Ali一家報仇，後來發現一切都係誤會。口頭禪同樣都係英文「What The」、「Holy Sh…」、「Oh my god」等等，「不過佢造型上就有啲唔同，劇中陳豪留有長髮及鬍鬚，而且有結實腹肌，身形fit爆。
《來自喵喵星的妳》
陳豪喺劇中飾演物理學家博士薛丁甲（Garfield），同胡定欣飾演夫妻。劇中終於唔係形男，而係搞怪髮型再加上一副幼框圓形眼鏡，真係成個科學家咁。
《陪著你走》
陳豪喺劇中飾演廣告公司創意總監甘言重（繼承大叔），同飾演盲人嘅胡杏兒係情侶關係。劇中陳豪多數著運動裝束加上蠟起嘅髮型，有別於佢其他戲嘅造型。劇中都係用平時幽默感嘅演繹風格。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
