《愛美麗狂想曲》黃庭鋒憑爆肌身型獲關注 入行五年機會多上年榮升業主

無綫劇集《愛美麗狂想曲》正在熱播中，唔少演員表現令人眼前一亮，當中包括飾演李佳芯19歲繼仔周卓軒嘅黃庭鋒（Telford）。其實佢哋嘅真實年齡只係相差6歲，唔少網民都認為佢哋做母子好有違和感。不過黃庭鋒仍憑陽光笑容及爆肌身型，成功吸引大家嘅關注。入行只有五年嘅黃庭鋒，獲得唔少演出機會，上年更擲500萬買樓，榮升業主。

現年32歲嘅黃庭鋒，自細已經熱愛運動。佢中學時期喺英國留學，當時已經係學校足球隊嘅前鋒球員，亦係全隊唯一嘅亞洲球員。另外，佢參加過唔少比賽，仲試過喺校際比賽拎最有價值球員獎。喺接受傳媒訪問時，Telford講過佢當時嘅教練係前英國蘭代表隊嘅預備球員，教練當時選佢去試腳，不過佢就覺得英國球壇競爭大，所以就選擇返香港讀體育系。畢業後，佢就順理成章去咗國際學校做體育老師。

除咗熱愛運動，黃庭鋒亦非常喜歡幕前工作，所以佢就選擇一邊讀碩士課程，一邊喺NowTV兼職做體育節目主持。之後，佢經學生家長陳芷菁嘅介紹下，喺2016年加入無綫。入行只有短短五年，但已經參與唔少節目及劇集拍攝，例如節目《體育世界》、《香港原味道》、劇集《救妻同學會》、《愛美麗狂想曲》及待播劇《超能使者》等等。

黃庭鋒喺2018年嘅《萬千星輝賀台慶》贏得逾百萬獎金及獎品，去到上年佢更成功首次置業，購入位於天水圍一個價值逾500萬嘅兩房單位。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！