《新聞女王》首播真新聞主播都有睇 前主播麥詩敏列三大離地情節：好似誇咗！

由佘詩曼、李施嬅及馬國明主演嘅台慶重頭劇《新聞女王》喺噚晚（20日）首播，劇情講到巴士翻側意外，文慧心（佘詩曼飾）及梁景仁（馬國明飾）兩派為求爭奪公司資源，勢必搶得獨家消息。而喺意外現場嘅張家妍（李施嬅飾）就努力為意外做採訪，不過被許詩晴（高海寧飾）嘅短裙和煽情報道搶鏡，多個電視台新聞部勾心鬥角情節，睇到一班觀眾非常緊張。

《新聞女王》以電視新聞部作為背景，所以劇集除咗吸引觀眾之外，一班新聞部嘅主播們都有留意，好似有線男主播陳書君喺IG限時動態上載一張與新聞部同事睇《新聞女王》嘅相片，而相片中其中一人係財經主播鍾卓恆。

另外，兩位前新聞主播麥詩敏及姚雋彥亦有喺個人社交網站分享對劇集嘅「觀後感」，麥詩敏喺IG限時動態指劇集有三個離地嘅地方，分別係「廠內專人補妝、戴耳機，絕對唔會有發生」、「臨出街前30秒企起身話唔讀，要脅上司，好似誇咗！」及「咁急嘅LIVE有時妝都冇時間化，佢仲慢慢喺度戴耳環！」。而姚雋彥就喺Facebook出PO話：「CREW車係寶馬，呢個電視台新聞部咁富貴，我搭開HIACE㗎咋！做Live都有稿讀，Add Lip兩句講埋鋪毛（Promote）就收工，呢份工真係易做。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！