《法證先鋒V》落實開拍 周柏豪孭飛做男主角

無綫劇《法證先鋒》系列口碑和收視俱佳，係唔少人心目中嘅經典神劇。上年播出嘅《法證先鋒IV》全劇平均收視36.3點；結局周平均收視更有38.8點，打破近七年嚟最高收視劇集紀錄，真係好犀利呀！劇集有咁好嘅成績，令到無綫決定添食開拍第五輯，而其中一位男主角將會係周柏豪。

以科學鑑證為題材嘅《法證先鋒IV》，主要講述「滅罪鐵三角」高Sir（黃浩然飾）、Dr. Man（李施嬅飾）及King Sir（譚俊彥飾）攜手合作，透過法證科學及執法精神去披露罪惡真相，將兇徒繩之於法。去到劇集大結局嘅時候，法證、重案同法醫一齊去海邊查案，四具屍體都穿上小丑裝束，其中一具屍體更擺出五字嘅手勢，疑似為續集舖路。

今日就有報道指頭四輯嘅監製梅小青退休，而監製位置就會換上第四輯嘅執行監製方俊華，編劇就會係金像獎最佳編劇兼《使徒行者》系列編審葉天成。葉天成喺接受訪問時就話自己現時為《法證先鋒V》做緊準備。至於早前傳出無綫將會開拍《黑社會》，佢就話佢哋諗過好多題材，上年係構思過類似關於60／70年代嘅香港黑社會、警察嘅戲，不過就冇正式落實，只係傾過故事大綱，劇本都冇出過。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！