《無間道》60歲梁朝偉與42歲陳冠希日本Re-U 網民：EDC仲老過殘過偉仔

今年係港產片經典《無間道》上映20周年，電影公司將3部曲數位修復，並將於12月30日跨年檔上映。日前電影舉行4K修復版巨幕特典場，不過只有「劉建明」劉德華現身，原來另一男主角「陳永仁」梁朝偉身在日本，仲同飾演年輕版劉建明嘅陳冠希（Edison）喺活動上相遇。陳冠希仲開心上載二人合照到社交網站，不過就被網民指佢老過梁朝偉。

現年42歲嘅陳冠希，初出道時集「型英帥靚正」於一身，成功迷倒一眾少女，不過喺2008年艷照事件後，形象插水，漸漸減少幕前工作。近年佢不斷被指狀態不復當年，臉上嘅魚尾紋及M字禿盡現，男神降級成中年大叔。喺噚日（15日），陳冠希喺社交網站上載與60歲梁朝偉嘅合照，原來二人因Sacai創辦人兼設計師阿部千登勢嘅關係，喺日本意外Re-U。

此PO一出，網民隨即起哄，紛紛興奮留言，例如「男神跟男神」、「陳永仁 劉建明 太帥啦」、「兩大男神啊」及「兩代男神」等等。不過亦有唔少網民將佢哋嘅外表作比較，留言話「偉仔拍埋去點解仲後生咗？」、「EDC仲老過殘過偉仔」 、「果然是梁朝偉更帥一點 這是Edison自己承認過的」及「陰公，陳生仲皺過梁朝偉」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！