《美女廚房》地獄廚神椋名凜變5寶媽廚藝大升呢 大仔今年升中學

TVB節目《美女廚房》令唔少女星廚藝「見光死」，周秀娜、GEM等都被封為地獄廚神，其中一位當年來港搵食嘅日本女星椋名凜，喺節目度煮過臭豆辣椒蝦同埋喇沙米粉，搞到一眾觀眾同主持掩鼻兼雞飛狗走，真係隔住個mon都聞到臭。

事隔15年，椋名凜原來已經返日本生活，仲成為5個小孩的媽媽。早前日本開學日，椋名凜同大仔影相放上IG，唔經唔覺椋名凜大仔都升中學！開學當日，椋名凜就好似其他日本媽咪咁，以端莊打扮出席開學禮，阿仔亦著上整齊西裝，似乎有媽咪咁高。

今年44歲嘅椋名凜，2005年前後來港發展，不時以性感造型示人。2007年獲邀上《美女廚房II》做嘉實，煮出綠色嘅喇沙米粉「技驚四座」，主持鄭中基抵死到隔住口罩試食，現場觀眾食完立即衝去廁所嘔，甚至有傳主持之一梁漢文同另一名觀眾因為試食搞到食物中毒！多年之後，鄭中基拍片講返當年情況，佢話自己喺節目中太苛刻，錄影完想同椋名凜道歉，但對方已經喊住走，而且當日係椋名凜生日，令佢更感內疚，於是多年後拍片各椋名凜公開道歉。

2010年椋名凜同賽車手高村直樹結婚，婚後一共誕下5個仔女。可能知恥近乎勇，椋名凜會做愛心便當俾小朋友，睇相見到似乎相當吸引，相信煮藝已經大有進步。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！