《聲夢一》合體 ｜爆肌張馳豪孖林智樂、潘靜文 組限定組合開演唱會 Aska預告台上除衫騷Body

《聲夢一》出道的張馳豪（Aska）、林智樂（Felix）及潘靜文（Sherman）宣佈合體為全新一系列現場音樂會《音樂出沒》打響頭炮，三人從歌唱比賽出道，可謂憑實力開騷，成為《音樂出沒》系列首個演出單位組合，大會特以「First Jump」為題，三人落力跳足8小時做跳躍動作拍攝演唱會海報呼應主題，以迎接於下月（5月）18日晚上8時30分假海洋公園安盛怡慶坊舉行的《音樂出沒 First Jump 第一彈 ：Aska 張馳豪 X Felix 林智樂 X Sherman潘靜文》，門票於昨日（4月15日）已正式開始公開發售！

操肌fit爆的張馳豪，日前於新歌MV以魚網背心、透視恤衫大尺度演出，又出新歌又開演唱會，被力捧的Aska直言感到開心又興奮：「我拍MV之前已經比平時再爆seed操肌同控制埋飲食，（會唔會操得太盡？）因為想將自己最好嘅一面喺台上騷俾大家睇，報答返Fans同大家嘅支持。嚟緊(5月18日) 開騷我都要繼續再爆seed操，希望到時效果比海報更加『爆肌』! 」被問到於個唱上會否如MV般大尺度演唱新歌，Aska大方預告：「台上除衫騷Body一定冇問題！會構思其他大尺度的演出，而家要就先賣個關子！總之買飛入嚟睇！」

而日前獲炎明熹（Gigi）邀請任頭場演唱會嘉賓的林智樂（Felix）則透露已邀請了Gigi睇騷：「佢(Gigi)本身都知道我哋三個開騷，我喺後台都有親自邀請佢嚟睇返我個騷！」Felix與Aska老友鬼鬼，早前連見偶像A-Lin自肥都一齊，大膽邀請對方聽自己新歌：「其實當日仲撞到我哋《聲夢》導師 Gin Lee、泳兒同Janice，我有逐個邀請佢哋嚟睇騷，被公司同事笑我有鋪『邀請癮』，去到邊都邀請人，做咗人肉流動宣傳，我都畀個叻自己！」

唯一一位女將潘靜文（Sherman）被問到怕不怕2男1女最後組成「嬲」組合，Sherman謂：「 佢兩個私底下係隻甩繩馬騮咁，希望去到綵排及演出嘅時候，唔會畀佢哋激到氣絕！不過，歌單方面都想可以搵啲合唱歌，又或者有啲位可以合埋我哋三把「男女男」聲去唱，仲諗緊會唔會可以re-arrange啲歌去呈現出嚟！」

演唱會詳情：

日期: 2024年5月18日 (星期六)

時間: 20:15

地點: AXA Applause Pavilion 海洋公園 安盛怡慶坊