《青春不要臉》由新生代演員擔大旗 平均年齡只有25歲

小品愛情劇《香港愛情故事》由新晉監製林肯操刀，上年年尾播出時大受歡迎，劇集更喺《萬千星輝頒獎典禮》上獲得多個獎項。今次佢開拍以80年代作為背景嘅青春喜劇《青春不要臉》，劇集已經拍攝得如火如荼，參演嘅主要演員平均年齡只有25歲，當中包括劉穎鏇、余德丞、丁子朗及戴祖儀。無綫嘅青春劇向來都可以成功捧紅一班年輕新演員，更係唔少觀眾嘅青春回憶，相信觀眾應該會好期待。而家就同大家睇下有邊幾位年輕演員有份主演啦！

劉穎鏇（23）
2016年港姐亞軍劉穎鏇（Tiffany），入行以嚟係以健康爽朗形象示人，除咗為綜藝節目《學是學非》及《3日2夜》等擔任主持之外，劉穎鏇亦有參與劇集拍攝，例如《兄弟》、《踩過界II》及《大步走》等等，明顯備受力捧。新一代上位小花之一嘅Tiffany，今次《青春不要臉》仲係佢首次擔正女一。

余德丞（31）
余德丞（Dickson）喺2013年加入無綫，憑住靚仔樣被封為「TVB新一代男神」。佢除咗擔任足球賽事嘅評述員及節目主持之外，近年開始加入劇組，例如《誇世代》、《福爾摩師奶》及《使徒行者3》等等，今次同樣係Dickson首次擔正做男一。

丁子朗（23）
2016年港男亞軍丁子朗，形象健康又靚仔。入行後機會多多，主要以司儀及主持工作嘅佢，越嚟越多拍劇機會，除咗拍攝中嘅《青春不要臉》之外，淨係待播劇就已經有4套，包括《逆天奇案》、《七公主》、《金宵大廈2》及《把關者們》，絕對係新一代上位小生之一呀！

戴祖儀（25）
戴祖儀（Joey）2018年以歌手身份入行，因樣子甜美及修長美腿成功吸引網民關注。雖然Joey入行時間唔長，但經常喺無綫綜藝節目見到佢，例如《粵講粵㜺鬼》、《#後生仔傾吓偈》、《學是學非》及《港產旅行團》等等。喺2019年佢仲首次參與劇集拍攝，喺《多功能老婆》中飾演周柏豪女友Miss呂，成功入屋。

伍富橋（26）
2014年參加《超級巨聲4》入行後嘅伍富橋（Alvin），喺2017年正式出道。佢除咗有歌出之外，拍劇嘅戲份亦越嚟越重。

孔德賢（23）
有「理工羅仲謙」之稱孔德賢（Danny）喺《#後生仔傾吓偈》以KOL身份參演，2019年正式加入娛樂圈。入行後Danny參與唔少節目及劇集拍攝，例如《香港原味道》、《眼睛去旅行》、《兒科醫生》及《把關者們》等等，相對起其他同期新人，佢嘅演出機會明顯多好多。

游嘉欣（21）
游嘉欣（Kayan）同樣以KOL身份入行，雖然入行時間好短，但已經有唔少演出機會，除咗擔任《#後生仔傾吓偈》主持及做《天天開運王》嘉賓之外，佢亦開始參與劇集拍攝，例如《香港愛情故事》、《使徒行者3》及《刑偵日記》。Kayan憑《香港愛情故事》中自然不造作嘅演技獲得網民支持，成功入屋。另外，樣子甜美嘅佢，更被封湯洛雯接班人。

伍樂怡（28）
2017年落選港姐伍樂怡（Kelly），雖然大熱倒灶，但入行後機會不絕，當中憑《3日2夜》被網民捧為「仙氣女神」。除咗綜藝節目之外，佢喺拍劇方面嘅戲份亦越嚟越多，上位在望！

林正峰（26）
林正峰以KOL身份入行，除咗主持《#後生仔傾吓偈》之外，佢亦有為《香港原味道》及《安樂蝸》等擔任主持。拍劇經驗唔多嘅佢，早前憑《香港愛情故事》中飾演一個默默守護游嘉欣嘅「萬能兵」邱凱傑，獲得網民讚演技自然。

徐文浩（25）
徐文浩同樣係《#後生仔傾吓偈》成員，入行後主要以主持工作為主。至於拍劇方面，初期已拍攝劇集《救妻同學會》，佢亦有喺上年嘅《香港愛情故事》飾演大學男神徐浩楠。

郭柏妍（23）
「港版子瑜」郭柏妍（Rosita）係應屆港姐季軍，未卸任已殺入劇組，繼《白色強人II》與陳豪有對手戲後，再次獲得拍劇機會。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！