「亞視一姐」薛影儀下周推出個人單曲 網民勁期待：正過素海霖

現年38歲嘅「亞視一姐」薛影儀（阿儀），喺上年獲加薪轉簽亞視子公司AMM亞洲心動娛樂(Asia Momentum Media)，除咗繼續做「亞視一姐」之外，仲有機會到大馬發展。去到今日（31日），阿儀喺IG宣布即將推出個人單曲，正式進軍樂壇。

阿儀早前已經灌錄由自己創作嘅首支個人單曲，並透露於大馬拍攝MV。喺今日下晝，阿儀喺IG上載MV Teaser，並留言話：「齊齊倒數 4月5號 #一加一等於阿儀 #薛影儀首支個人單曲」，估計歌名就係《一加一等於阿儀》。喺Teaser中首先見到阿儀嘅側面剪影，並數白欖方式讀出：「7、8、9、10、11、12…阿儀」，之後穿上粉紅色毛毛衫嘅阿儀就好有台型咁出場，並轉咗一個圈，盡顯一姐風範。

阿儀喺上年推出虎年賀年歌《財神888》，雖然MV風格迷幻又靈異色彩，不過成功為大家增添歡樂氣氛。阿儀首支個人單曲將與4月5日上架，唔少網民都紛紛留言鬧表示支持及期待，例如「用作品說話，支持」、「呢個新形象幾好」、「2023叱咤女金預定」、「一個阿儀已經打低晒Mirror 12個」、「淨係呢段我都睇咗三十次，咁正得唔得架？」、「加油！一首只係屬於自己嘅單曲 支持阿儀」、「巧興奮呀」、「Omg omg 好型啊」、「正過素海霖」及「期待BB單曲」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！