「你係咪嬲咗我」小學生辯論片翻hit 反方女生13年後成國際政治顧問

近日一條2011年小學辯論嘅比賽影片喺網上再次翻hit ，期間當中一名女生問對方男生「你哋係咪嬲我呀？」，而「接招」嘅男同學醒目回應「我哋不如做咗正經嘢先」，令網民留下深刻印象。片段成為熱話之後，網民立即搜尋比賽中幾位同學嘅下落。

片段中嘅比賽由協恩中學附屬小學（反方）對油蔴地天主教小學（海泓道）（正方，下稱油天），辯題係「香港兒童真幸福」。當日擔任協恩結辯並發問「係咪嬲咗我」嘅女生阮曙淇，小學後直升名校協恩中學，而且繼續參加學校辯論隊，更成為協恩普通話辯論隊隊長，曾帶領協恩獲得基本法盃全港校際辯論比賽奪得七連冠。阮曙淇後來升讀香港大學政治與公共行政學系，以一級榮譽成績取得政治與公共行政暨新聞及傳媒研究雙學位。

阮曙淇畢業後以香港政府嘅「香港卓越獎學金」，到巴黎政治大學修讀國際管治及外交碩士，亦曾到聯合國教科文組織（UNESCO）實習，主要研究AI人工智能。阮曙淇今年1月加入全球最大嘅政治風險諮詢機構London Politica出任顧問，現時身在法國。參加辯論比賽多年後，阮曙淇曾經為德瑞國際學校擔任辯論教練。

而喺辯論賽中，為「係咪嬲咗我」呢段發言「打圓場」嘅協恩第二副辯梁逸琛同學，有傳媒搵到協恩老師查詢，回應話梁而家喺一間英國公司任職實習律師。

至於喺呢場辯論比賽中勝出嘅油天隊，迅速就「係咪嬲咗我」回應嘅男生陳加維，獲選為得該場辯論嘅最佳辯論員。據知陳加維小學畢業升讀九龍華仁書院後，都有積極參與辯論活動。有網民報料指，陳加維目前已移居外地。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！