「格仔導演」Mike導IG突發長文宣布暫別 網民：等幾耐都等

「格仔導演」劉諾衡（Mike導）過去為ViuTV拍攝多個綜藝及旅遊節目，包括《花姐ERROR遊》系列、《ERROR自肥企画》、《美女郊遊遊》、《大海男兒》、《香港秘密搜查官》，每個節目皆造就出極大嘅話題。2022年，Mike導踩過界開設室內攀石場做老闆，翌年則帶領佢嘅班底攝製隊到非洲南非和烏干達拍攝ViuTV節目《無制限探險隊》，向來大膽嘅佢自薦參加真人避彈衣試驗，測試9mm橡膠子彈威力，為拍攝「黃金畫面」，於槍械專家同意下取走防彈板僅著上避彈衣，不過子彈意外穿過避彈衣，傷口不斷流血要上白車治理。Mike導大膽創新風格引來觀眾迴響；不過，Mike導於上周五（19日）突於IG發長文宣告暫別。

Mike導發長文表示今年係入行第8個年頭，拍過有趣嘅節目及做過無謂嘅製作：「但無可避免地，任何人堅持做任何事，步入瓶頸係必然嘅」；Mike導續指，已決定休息亦未知會唞幾耐：「個世界變得好快。環境會變； 文化會變；人會變；我會變。我喜歡創作，不過唔知幾時開始，發現熱愛嘅事物單純地變咗做唔想失去嘅事物⋯⋯ 開始有啲驚，驚有一日唔再鍾意做呢件事 所以，我決定唞唞，未知唞幾耐，假如一段唔知幾長嘅時間過後，世上仲有人會期待睇到我作品嘅話，都係一件幾浪漫嘅事 不過，你要等等，未知等幾耐」，唔少曾與Mike導合作過嘅藝人及網民都紛紛留言替Mike導打氣，包括保錡、咖喱、程人富等等，網民多數都係叫Mike導好好休息，又表示會等佢返嚟，期待將來會有更多精彩作品：「見攰休息，等你新作品」、「休息一下先啦，照顧好自己既身心，堅持初心和創作，從來都不易」、「歡迎進入創作樽頸，一個有血有肉嘅創作人必然遇到嘅地方。好好擁抱呢個過程，期待你搵到更好嘅自己同作品！」、「等幾耐都等」及「隨心意行」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！